“Talderik onena, Geurea. Zure osasuna esku onetan”. Hauxe da Osakidetzaren azken kanpainaren leloa. Euskarri grafikoetan kategoria ezberdinetako 9 langile agertzen dira, baina batere ez garbiketa, sukalde edo mantentze-lanetako zerbitzuetatik, besteak beste. Ez da kasualitate hutsa, kategoria hauek abiadura handian pribatizatuak izaten ari direnak baitira.
Osakidetza ezin da “taldeaz” aritu eta osasun arretarako nahitaezkoa den kolektibo oso bat desagerrarazi. Argi dago honen atzean dagoena kategoria hauek “ikusezin” bihurtzea baino ez dela, honako lanak ahalik eta errazen pribatizatzeko asmoz.
Kanpaina diskriminatzaile hau kritikatzeko helburuarekin, Osakidetzaren kartelaren antza daukan beste bat egin du LABek, baina kasu honetan “ahaztutako” kategoriekin eta Zuzendaritzen pribatizazio politika kritikatuz.
Osakidetza ez da kortijo bat, ezta Batzokia ere. Bere zuzendaritzak ezin du plantillaren talde oso bat mespretxatu, langile hauek ere, egunero, eurenak eta bi egiten dituztenean EAJren murrizteko eta pribatizatzeko politiken aurrean, herritarroi ahalik eta osasun arretarik onena eman ahal izateko.