Ororbiako KYBSEko LAB, ELA, UGT eta CC sindikatuetako ordezkariok otsailaren 3an prentsan agertutako informazioa argitu nahi dugu. Bertan, CCOO sindikatuak enpresa batzordeak irabazitako epaia aldebakarreko garaipen sindikal gisa aurkeztu zuen, benetan lan kolektiboa izan denean.
Enpresa-batzordearen lan-formula da ahobatezko langileen defentsarako salaketa kolektiboak txandaka jartzea. Gure batzordean ordezkaritza duten sindikatuen artean zerbitzu juridikoekin berdintasunez jokatzeko eta lan sindikala banatzeko mekanismoa da.
Beti errespetatu izan dira lorpen eta garaipen judizialak, atal sindikal guztiek egindako lan kolektiboa inork bereganatu gabe, norberen mesederako zabaldu gabe. Sinatzaileok gure atsekabea adierazi nahi dugu jokatzeko modu honen aurrean. Fabrikako langile guztiekiko, alegia 750 pertsona baino gehiago, errespetu falta nabarmena da.
Hau esanda, demanda kolektiboak epaitegian lortutako garaipena positibotzat jotzen dugula azpimarratu nahi dugu. Epaiak enpresa zigortzen du Ororbiako fabrikako muntai lerro bat garaiz martxan ez jartzeagatik eta bolumenak ez betetzeagatik.
Mezu argia helarazi nahi diogu multinazionalari: hitzarmena betetzeko dago. Eta betetzen ez denean borroka sindikala funtsezkoa deritzogu zuzendaritzaren jarduna eta lantegiak duen lan karga kontrolatzeko eta gure lan eskubideak defendatzeko.
Enpresak epaiaren aurka errekurtsoa aurkezteko asmoa du, baina epai honek mezu argia helarazten du, enpresa-alderdiari gogoeta eginarazi behar diona: akordioak nahitaez bete beharrekoak dira, hala ez bada, langileok zorrotzak izan behar dugu gure hitzarmen kolektiboaren defentsan, eta bide judiziala beste tresna bat da gure eskubideak baliarazteko.