Tuterako La Serna industrialdean dagoen Oleofat enpresan hauteskunde sindikalak egitea sustatu genuen abuztu hasieran. Erantzun bezala, enpresak LABen hautagaia kaleratu zuen. Kaleratzea salatu eta gure hautagaia berriro lanean hastea eskatzeko mobilizazioa egin dugu Tuterako Foru Plazan.

Gezurretan oinarritutako diziplinazko kaleratzeak bidegabeagoa eta mingarriagoa egiten du oraindik. Langileak ez du ohartarazpen bakar bat ere izango enpresan lanean eman duen denbora guztian.

Foru gobernuak Oleofat proiektua interes lokaleko inbertsio izendatu du, etorkizun oparoa izan dezakeen enpresa delako. Gobernuak lupaz begiratu beharko luke, halaber, langileei ematen zaien tratua, beren eta lankideen eskubideak defendatzea erabakitzen dutenean. Gainera, Oleofaten azken hilabeteetan izandako lan-istripuetako batzuk ere arretaz begiratu beharko lituzke, adibide pare bat jartzearren.

LAB sindikatutik bere jarrera zuzentzeko eskatzen diogu enpresako zuzendaritzari , eta bide berri bati ekin diezaiola, arazoak konpontzeko bide moduan langileen eskubideen errespetua erabiliz. Langile hori berriro hartzea eta eredu sindikalak jazartzen ez dituzten hauteskundeak egitea eskatzen dugu.

Bitartean, honelako egoerekin amaitzeko lanean jarraituko dugu eskura ditugun baliabide guztiekin.