Ohikoegi bihurtzen ari da hainbat alderdi eta komunikabide hartu duten kontrol ideologikoaren estrategia. Hau da, EITBk albiste edo programa baten ikuspegia gogoko ez dutenean jazarpen makineria martxan jarri, eta profesionalak erasotzeari ekiten diote helburu anitzarekin: langilea deuseztatu edo gutxienez autozentsurara bideratzea, eta arduradunak zentsurara jotzea. Kasu honetan testuingurutik ateratako programa baten irudien erabilera maltzurrarekin abiatu dute eraso zentsuratzailea.
Erasoaldi berri hau une delikatuan dator gainera, hain zuzen eragile politiko eta sozialok EITBren birpentsatze bat eskatzen ari garenean. Eztabaidan eragiteko modu onartezina erakusten ari dira berriro ere hainbat alderdi eta komunikazio talde.
EITBko LABek zentsura ahalegin guztiak salatzen jarraitzen du, kanpotik zein barrutik datozenak. Horrela, alderdi eta komunikabideei adierazpen eta informazio askatasuna ez urratzeko exijitzen diegu.
Era berean zuzendaritzari ere exijitzen diogu presio horien aurrean ez erortzeko eta alde batera uzteko zentsurarako edozein keinu, propio zein kanpotik eragindakoa. Ez dugu ulertzen zer esan nahi duen berriro ez gertatzeko neurriak hartuko dituela esaten duenean. EITBko LABen ustez zuzendaritzak hartu behar duen neurria langileoi askatasunean lan egin ahal izatea bermatzea da.