Nafarroako Gobernuak 5.498.455 euro xahutu nahi ditu UGT, CCOO eta CENekin batera burutuko omen diren zenbait programetan. Kopuru horren seirena (900.000 euro) ez da sikiera programa batera bideratuko; aitzitik, UGT, CCOO eta CENi emandako dirulaguntza zuzena izango da, "Elkarrizketa Sozialaren Mahaia" delakoan parte hartzearen truke.

Ez da parte hartze instituzionalarengatik beste arlo batzuetan edo beste komunitate batzuetan jasotzen den konpentsazio horietako bat, baizik eta borondateen sal-erosketa hutsa. UGT eta CCOOek Patronala, Opus Dei eta UPN-PSNren inguruan eraikitako Erregimena babesten dute, prebendak jasotzearen truke. Nafar langileriak 1996an elkarrizketa soziala izenekoa hasi zenetik egoera kaxkarrena bizi duen bitartean, UGT eta CCOOen kezka bakarra beren burokrazia sindikala diru publikoarekin mantentzea da. Duela hilabete Iruñeko kaleetan milaka lagunek aldarrikatzen zuten aldaketa sozialak, aldiz, sare klientelar hauekin amaitu, lan prestakuntza eta bestelako arloak publifikatu nahiz lan harremanak demokratizatu behar ditu.