Irunen mobilizatu gara gaur, joan den astean bertan hildako langilea gogoan, euskal gehiengo sindikalak deituta. Langile honek lehen lan-eguna zuen enpresan. 2022. urtea hasi besterik ez da, eta, gutxienez, bost langilek galdu dute bizia lanean. Honi gehitu behar zaizkio asteotan gertatutako lan istripu larriak, AƱorgako Cementos Rezolan gertatutakoa, kasu. Azken istripu honen aurrean, kontzentrazioa egin dute gaur bertako langileek enpresa-batzordearen deialdiari jarraituz.
Hain zuzen ere, B.J. langilea oso larri dago AƱorgako enpresan joan den ostegun arratsaldean istripua izan eta gero. Langile migrantea istripuaren ondorioz elbarri geratuko da. Langilea azpikontratatuko langilea zen, eta GERFOR SLU Bartzelonako enpresarentzat egiten zuen lan. Bi egun besterik ez zeramatzan enpresa horrek Cementos Rezolan lanean, eta istripua gertatu zen moduagatik (makina batekin lanean ari zela berau amildu zen 6 metroko altueratik) argi dago beharrezko prebentzio neurriak ez zirela hartu.
Azpikontratazioak heriotz arriskua areagotzen duela argi geratu da beste behin ere, eta migranteei buruz zabaltzen diren gezur handien atzean dagoen errealitatea azaleratu da berriro ere: asko eta asko lan baldintza gogorretan lanean ari dira, euren bizitza arriskuan jartzeraino.
LABek gertatutakoa salatzen du eta bere elkartasuna adierazi nahi dio ezbeharra jasandako langileari, eta Cementos Rezolan enplegu zuzenaren aldeko borrokan jarraitzeko konpromisoa hartzen du, azken hilabeteetako lanuzteekin egiten ari den moduan.