LAB sindikatua altxatu egin da Bizkaiko bulego eta langeletako hitzarmenaren negoziazio mahaitik, patronalaren blokeoa dela eta. Hala, hurrengo asteetan egingo ditugun mobilizazioetatik lehena gaur egin dugu Bilbon, CEBEK-en aurrean. Bertan izan da Garbiñe Aranburu idazkari nagusia, eta nabarmendu du gure ekintza sindikala borroka honen zerbitzura jarriko dugula estatalizazioari aurre egiteko, lan hitzarmenaren defentsan. Era berean, borrokarako deia egin die gainontzeko sindikatuei, Bizkaiko bigarren hitzarmenik handiena baitago jokoan.
2013tik lan hitzarmena berritu gabe dago Bizkaiko bulego eta langeetan. Hortaz, estatalizazioaren mehatxupean dago, baita eremu batean estatalizaziopean ere. Izan ere, bulego, langela eta kontsultoriek osatzen dute arloa, eta kontsultorien eremuan jada estatalizazioa gauzatu dute. Era berean, kontratazio berriei hitzarmen estatalaren baldintzak ezarri dizkiete dagoeneko.
Langileen lan baldintzak errespetatu dira orain arte, baina kontratuari lotuta, ez lan hitzarmen baten babesean. Hortaz, ezinbestekoa da lan hitzarmenaren alde borrokatzea, are eta garrantzitsuagoa honako hau Bizkaiko bigarren hitzarmenik handiena denean, 23.000 langileei eragiten diena.
Langileak borrokan daude 2013. urteaz geroztik. Batasun sindikala izan zen hasieran, ELAk apurtu zuen arte. Bere kasara, inongo lanketa eta kontrasterik gabe, greba mugagabera deitu zuen, handik hiru astera deialdia bertan behera uzteko.
Garbiñe Aranburuk azaldutakoaren arabera, “irtenbideak ezin du izan hitzarmen epel bat, ezta patronalaren neurrira egindako hitzarmen bat ere, CCOO eta UGT sindikatuek planteatu bezala. Konponbideak ere ezin du izan, ELAk egin bezala, greba mugagabe batera deitzea gehiengo sindikala izan gabe, jakinda horrek ez duela gatazka konponduko. ELAk gatazka hau instrumentalizatu nahi izan du bere interes korporatiboen mesedetan, beste gatazka batzuetan egin ohi duen moduan, bere burua sindikatu borrokalari gisa irudikatzeko. ELArentzat, aliatu bat baino, LAB lehiakide bat dela ematen du; eta ELAk ongi baino hobeto daki, guk dakigun bezala, patronalaren aurkako borroka erreal eta eraginkor bat pizteko LAB behar duela”.
Honela gauzak, Garbiñe Aranburuk azpimarratu du ez dagoela hitzarmenik mobilizaziorik eta batasun sindikalik gabe. Hortaz, LABek proposatutako borrokarako egutegiarekin bat egin dezaten eskatu die sindikatuei.
Hain justu, gaurko mobilizazioaren ondoren, langileen aktibazioa eta atxikimendua lortzeko sinadura bilketa bat abiatuko dugu eta martxoaren 28an hiru orduko lanuzteak egingo ditugu, besteak beste. “Gure helburua gainontzeko sindikatuek bat egitea da, hitzarmen duin bat defendatu nahi dugulako”, erantsi du LABeko idazkari nagusiak.