Gaur, apirilak 29, negoziazio mahaiaren bilera berri bat burutu da. ADEGIk, beste behin ere, sindikatuei entzungor egin die eta ez du ezer berririk aurkeztu. Idatzizko proposamen bat aurkeztu gabe jarraitzen du. Ez dio erantzuten sindikatuon proposamenari: ez ditu onartzen ez lizentziak, ez errelebo kontratua, ez bajak, ezta lanbide kategoriak ere… 4 urteko indarraldia eta 0,5eko soldata igoera ziztrin bat baino ez ditu eskaintzen.
Sektorearen egungo egoera oso ona da eta ADEGIren jarrera ez dator bat berarekin. ADEGI bere jarrera arduragabearekin negoziaketa blokeatzen ari da eta sektorea konfrontaziora eramango du.
Blokeo egoera honen aurrean, LABetik uste dugu soilik mobilizazioen bidez mugiaraziko dugula patronala. ADEGIk akordio bat gauzatu nahi duela erakusteko hurrengo maiatzaren 17ko bileran idatzizko proposamen bat aurkezteko exijitzen dio LABek.
Hau aurkeztu ezean, ADEGIk sektorea konfrontaziora eramango du eta hitzarmen justu bat lortzeko mobilizazioaren bidea baino ez zaigu geratuko.