Urdulizko automozio-lantegiko beharginek beren etorkizunaren jabe izan nahi dute. Horrenbestez, Mecanerrentzako bideragarritasun-plan bat osatzeko prozesua abiarazi dute, egungo erronkei helduko diena. Jarraian irakur daiteke enpresa batzordearen komunikatua:
“Irailaren 1ean, Mecaner enpresak jakinarazi zigun Stellantis multinazionalak Urdulizko Mecaner lantegia ixteko erabakia hartu zuela, ekoizpena deslokalizatu eta 148 pertsona kalean utzita.”Irailaren 1ean, Mecaner enpresak jakinarazi zigun Stellantis multinazionalak Urdulizko Mecaner lantegia ixteko erabakia hartu zuela, ekoizpena deslokalizatu eta 148 pertsona kalean utzita.
Bi hilabete hauetan, antolatu egin gara eta itxieraren albisteari erantzun diogu. Multinazionalarekin bide bat irekitzen saiatu gara, fabrika honen jarduera diruz lagundu duten erakundeetara jo dugu, eta Urdulizko eta eskualdeko bizilagunekin batera mobilizatu gara, gure eskualdea desegiten ari denaren kezkarekin eta ehun industriala eta lanpostuak defendatzeko beharrarekin bat gatozelako.
Bi hilabete hauetan, ahalik eta ate gehien jo ditugu Mecaner ixteko prozesua geldiarazteko eta soluzio bat bilatzeko. Oraingoz, Stellantisek uko egin dio elkarrizketarako bide bat irekitzeari, eta Eusko Jaurlaritzaren aldetik, hitz politak esan arren, ez dugu inolako laguntzarik jaso.
Langileok ez gaude prest besoak gurutzatuta izateko, gure etorkizunaren protagonista izan nahi dugu eta gara eta, beraz, lantegiaren bideragarritasuna bermatuko duen eta eskualdeko beharrezko trantsizio ekosozialari ekarpena egingo dion alternatiba baten alde borrokatzea erabaki dugu. Etorkizuneko industria baten alde borrokatzea erabaki dugu.
Horregatik, Urdulizko Udalaren laguntzari esker, langileok prozesu bat hasi dugu Mecaner-erako bideragarritasun-plan bat proposatzeko.
Badakigu automobilgintzaren sektorearen egoera zein den: Klima-aldaketaren errealitateak, egungo energia-ereduaren mugek eta ibilgailuak fabrikatzeko lehengaien gero eta urritasun handiagoak ekonomia deskarbonizatzea eta mugikortasun sozialki justuago eta
iraunkorrago baterako trantsizioa egitea eskatzen dute. Beraz, sektorea eraldatu egin behar da, zalantzarik gabe.
Izan ere, automobilgintzaren sektorea eraldatzen ari da, baina Stellantis bezalako multinazionalak zuzentzen ari dira, helburu bakartzat enpresa-irabaziak dituztenak, industriasarea deslokalizatzen dutenak eta langabeziara eta prekaritatera kondenatzen gaituztenak. Zoritxarrez, erakundeek diru publikoarekin laguntzen dute estrategia hori.
Ezin dugu eta ez dugu onartu nahi. Borrokarako prest gaude. Ixteko mehatxua etorkizun hobe baterako aukera bilakatu nahi dugu.
Prozesu bat prestatzen ari gara automobilgintzan eta eraldaketa ekologiko eta sozialetan adituak diren pertsonek osatutako talde batekin.
Helburua produkzio-aukerak bilatzea da, Mecanerren bideragarritasuna bermatzeko, lanpostuak bermatzeko eta etorkizuneko mugikortasun-ereduaren eta beste alternatiba batzuen alde egiteko. Mecanerren, ildo horretan lan egiteko azpiegitura, kualifikazioa eta, batez ere,
borondatea ditugu.
Horregatik guztiagatik, Eusko Jaurlaritzari eta erakundeei eskatzen diegu ez dezatela gure herriaren industria-subiranotasuna multinazionalen esku utzi, etorkizuneko industria jasangarriaren alde egin dezatela eta kalitatezko enplegua berma dezatela, langileok hasitako prozesuan modu aktiboan lagunduz eta parte hartuz.
Amaitzeko, dei egiten dizuegu Urdulizko eta Uribe Kostako bizilagunoi, bai eta eragile sozialei eta insitutuzioei ere, gurekin batera bide hau egin dezazuen, parte har dezazuen Mecanerren, eskualdeko industriaren eta ekologikoki eta sozialki justuagoa den trantsizio baten alde. Etorkizuna gurea da eta horren alde borrokatuko dugu.