Arratsaldean eskubide laboral eta sozialen alde eta Euskal Herrirako eredu propioa aldarrikatzeko Hego Euskal Herriko herri ezberdinetan izandako mobilizazioak ere oso jendetsuak izan ziren. Mobilizazio amaierako interbentziotan, apirilak 19an gure herrirako alternatiba sozial bat eraikitzeko prozesua bultzatzeko hartutako erabakiaren garrantzia azpimarratu zen. Lehenengo urratsa Euskal Herrirako Eskubide Sozialen Gutuna osatzean kokatu dute greba deitzaileek eta bide horretan dago joan den maiatzak 25ean lan honi hasiera emateko eragile sozial eta sindikal anitzek Eibarren burututako lehenengo asanblada nazionala.

EUSKAL HERRIRAKO ESKUBIDE SOZIALEN GUTUN BATEN ALDE

Gaur maiatzak 30ean, milaka eta milaka pertsonak Euskal Herriko kaleak bete ditugu. Euskal Herrian lan eta bizi den jendartearen sektore gero eta zabalagoak gezurtaratu, engainatu, maula egin, lapurtu eta explotatzen duen eredu ekonomiko, politiko eta sozialari ezetz ozen eta indartsua esan diogu. Gutxi balitz, euren grina produktibista eta konsumista dela eta, krisi energetikoa, klimatikoa eta elikadurazkoak kolapso ekologikora eramaten gaitu.

Madrileko Gobernuak lege eta dekretuak imposatu, langileriaren kontrako lan eta pentsioen erreformak egin, zerga politika erregresiboak aurrera atera, zerbitzu publikoen pribatizazioa eta liberalizazioaren alde legislatu eta goiko klaseen onurako politikak ezartzen ditu. Hego Euskal Herriko instituzioek, gehiengo sozialaren kontra doazen eraso hauei aurre egin beharrean eta beraien etekinak haunditze aldera, politika horiek goitik behera onartu eta beraien eremuetan gehiengoaren pobretze orokorra dakarten politika antisozial berdinak aplikatzen dituzte.

Egoera hau pertsona migranteengan areagotzen da. Arrazakeria bultzatu eta murrizketak eta era guztietako bidegabekeriak justifikatzeko, oinarririk gabeko aurreiritzi interesatuek jopuntuan jartzen dituzte. Era berdinean, kriminalizatu eta egiten duten giza ekarpen ekonomiko, sozial eta kulturala izkutatzen dute. Migrazioa bera ez da eskubidetzat hartzen.

Borrokaren ondorioz lortutako eskubide laboralak lan merkatuaren erreformen bitartez suntsitzen dituzte. Lan orduen luzapena, soldaten murrizketa, azpikontratazioa, kaleratzeen merketzea eta pobreziaren mugeen azpiko Langileen arteko Gutxienengo Soldata. Euren helburu bakarra gure lan eskubide guztiekin amaitzea da.

Gure eskubide sozialekin ere amaitu nahi dute. Prestazio sozial duinen bitartez gutxienengo dirusarrerak izatea milaka pertsonei ukatu eta langabeziaren prestazioak gutxitu eta gogortzen dituzte. Gutxi balitz, Dirusarrerak Bermatzeko Errenta eta Oinarrizko Errentaren erreforma eta murrizketez gain, prestazio hauek jasotzen dituzten pertsonak presionatu eta kriminalizatzen dituzte. Sistemak duintasuna, etxebizitza, greba eskubidea, elkartasuna, ingurugiroa, enplegu duina eta oro har gure bizitza beste modu batera antolatzeko aukera defendatzen dituzten mugimendu sozialak erasotzen eta kriminalizatzen defendatzen du bere burua. Isunak, debekuak, gezurrezko inputazioak, atxiloketak, muntaia polizialak, eskaera fiskal gogorrak…Den dena gu ixilarazteko!

Pentsionen erreforma berriak helburu garbia du, Euskal Herrian bizi eta lan egiten dugunon jubilazio duin baten izatearen ukazioa. Egungo eta etorkizuneko pentsioak gure lanarekin sortu eta sortzen dugun eskubidea izateari uztea nahi dute. Jasotzen dutenen, hots gure nagusien, gaitasun ekonomikoari erasotzeaz gain, etorkizuneko belaunaldiak, hau da gure gazteria, ezegonkortasuna eta babesgabetasunera kondenatzen du.
Elektrizitatea, ura, gasa, garraioak, zaborraren bilketa, telefonoa edo BEZaren etengabeko igoerak jasatzen ditugun artean, kenketa fiskalak enpresen mesedetarako aplikatu eta aberastasunaren konzentrazio hobesten duen zerga politika erregresiboak bultzatzen dira.

Zerbitzu publiko eta sozialen gero eta gehiago pribatizatzeak, bereziki hezkuntza, osasungintza, arreta soziala eta dependentzia zerbitzuak dagoeneko oso ahula den sistema publikoa, goitik behera txikitzeko aitzakitzat krisia erabiltzen ari dira. Prekarizazioa eta deseraketa soziala sakonagoa egiteko eta langile klasea zatitzeko. Emakumeon kasua bereziki larria da. Bizitzaren oinarria eta euskarria izanik lan erreproduktiboa eta zaintza lanak gure gain daude, batez ere.

Krisitik ateratzeko ezin dugu sistema honen kolaboratzaileak izan. Eraldaketa soziala eta sistema sozioekonomikoaren aldaketaren alde egin behar dugu eta explotazioa eta metaketari mugak jarri eta bizi baldintzak hobetuko dituen sistema bateranzko bidea hasi.

Era berdinean, apirilak 19an gure herrirako alternatiba sozial bat eraikitzeko prozesu bat bultzatzea erabaki genuen. Parte hartze sozialaren bitartez emango den prozesu honen lehenengo urratsa Euskal Herrirako Eskubide Sozialen Gutuna osatzea izango da. Zentzu honetan, joan den maiatzak 25ean lan honi hasiera emateko eragile sozial eta sindikal anitzek Eibarren lehenengo asanblada nazional egin genuen.

Egungo kapitalismo neoliberalaren aurrean patriarkatua, non emakumeok gero eta eskubide gutxiago izango dugun, militarismoa, kontsumismoa, kreditu errezak azpiegutura erraldoiak, AHT adibidez, fracking eta diru-gose harraparia oinarria izango ez dituen sistema berri baten sorrera, aukera bakarra dugu. Elkartasunezko sistema bat. Pertsonekin, naturarekin eta beste herriekin bat egingo duen sistema.
Politika publikoen lehentasunetan aldaketa sakona aldarrikatzen dugu eta Euskal Herriko egungo instituzioei beharrezkoak diren ekimen instituzional, politiko eta legislatiboak aurrera atera ditzaten deitzen ditugu, planeta amaikor batean hazkunde amaigabearen ilusioa bertan behera utziz. Instituzio horiei Estatuek zein nazioarteko instituzioek inposatzen dituzten neurriak ez aplikatzea, defizit publikoaren mugak ez onartzea eta Euskal Herrian lan eta bizi garen pertsonak fiskalitate orekatu eta progresiboa, kalitatezko serbitzu publiko unibertsalak, prestazio sozial egokiak, aberastasunaren banaketa orekatuagoa, kontsumo neurtua eta arduratsuagoa, aztarna ekologikoaren murrizketa zorrotza eta enplegu duina zein lan produktibo eta erreproduktiboaren banaketaren bidez bizi baldintza duinak eta ingurugiro osasuntsua izateko iniziatiba hartzea exijitzen diegu.
Salaketa eta borroka ezinbestekoak izanik haratago joan nahi dugu. Eskubide Sozialen Gutuna aldarrikapen tresna ez ezik, helburu argien inguruan indarrak eta borroka batzeko tresna ere izatea nahi dugu. Parte hartze herrikoiaren bitartez, Euskal Herrirako eredu propioa ahalbideratuko duen bidea egiten joan behar gara, ekonomiaren erdigunean eta merkatuaren lekuan bizitza bera jarriz.

Gaur, gobernu ezberdinetatik gure eskubideen kontra datozen eraso guztien eta jendarte eredu honen aurrean “nahikoa da!” ozen, irmo eta indartsua oihukatu dugu. Gure herrian bizi eta lan egiten duen biztanleriaren onuran oinarrituko den alternatiba eraikitzeko prozesu horri hauspoa emateko bultzada izan da. Mundu eta Euskal Herri ezberdin bat eraikitzeko dugu!

Euskal Herrian 2013ko maiatzaren 30ean

 

LAB SAREAN
{module[111]}