2024-09-19
HomeMaiatzaren Lehena 2015Maiatzaren lehena: langile garela harro esateko eguna

Maiatzaren lehena: langile garela harro esateko eguna

LABek Maiatzaren Lehenean kalera ateratzeko dituen arrazoiak iragartzeko agerraldia eskaini zuen Bilbon apirilaren 15ean. "Langileok borrokan, Euskal Herria aldaketa bidean" lelopean aurtengoan ere eskualdeka mobilizatuko da sindikatua, eskualde bakoitzeko errealitate ezberdinak eta bertan egindako borroken garrantzia mahaigaineratzeko nahiarekin. Ainhoa Etxaide, idazkari nagusiak, Maiatzaren Lehenaren protagonista borrokan den langilegoa dela azpimarratu zuen, baita "ospatzeko gutxi den arren, langile garela harro" egoteko eguna dela ere.

Maider Jauregi, LABeko Komunikazio idazkariak, 2015eko Maiatzaren Lehenaren diseinuren azalpenarekin eman zion hasiera agerraldiari. "Langileok borrokan, Euskal Herria aldaketa bidean" lelopean eskualdeka burutuko da aurtengoan ere langile eguna eta 25 mobilizazio ezberdin burutuko dira Euskal Herrian.

Ainhoa Etxaide, LABeko idazkari nagusiak, aurtengo Maiatzaren Lehena ez dela ospakizun egun bat adierazi zuen, ez dugula ezer "ospatzeko", baina era berean egindako lanaz harro egoteko badugula arrazoi nahiko adierazi zuen. Honela, aurtengo Maiatzaren Lehena harrotasun hori kalera ateratzeko eguna izan behar duela aldarrikatu zuen, langileok "ateratzen dugu Euskal Herria aurrera" gaineratuz. Zentzu honetan gobernuek hartutako bideari erreparatuz, gutxi batzuren mesedetan herriaren pobretzea hartu daitekeen biderik ankerrena dela salatu zuen, eta langilerik gabe ezin dela Herri bat aurrera atera adierazi zuen.

Hauteskundeen testuinguruan milaka lanpostu suntsitu dituzten agintari politikoen ahotan enpleguaren sorrera eta defentsa ardatz bihurtu dutela entzutea lotsagarritzat jo zuen LABeko idazkari nagusiak. Bien bitartean, langileok bakar bakarrik aritu dira lanpostuak defendatzen politiko horiek berak sinatu dituzten EREen kontra.

Sindikatuak 40 urte bete ditu aurtean, eta Etxaiderentzat garrantzitsua da ere aurtengoan LABeko militante "garela" harro aldarrikatzea; "harro gaude lau hamarkada hauetan LABek Euskal Herrian egin duen borrokarekin, askapena ekarriko digun bidean egin duen ekarpenarekin; eta harro gaude milaka eta milaka langileek LABen ikusi izana zapalkuntzaren kontra borrokatzeko tresna egokia".

40 urteko lanak emandako eskarmentuak sindikatuari arrazoia izatea ez dela nahikoa erakutsi diola adierazi zuen Etxaidek, eta horri buelta emateko indarra lortzea, garaipenak lortzeko bide egokiak bilatzen jakitea eta erasoen aurrean benetako harresiak eraikitzeko eraginkorrak izaten jakin behar dela gehitu zuen. Bide horretan, Maiatzaren Lehena ere, LABek langileei zer dien emateko plazara ateratzeko eguna ere bada.

Eskaintza horri zuzenduz, LABek hasi berri duen eredu berriaren eztabaida gogoratu zuen. 40 urte hauek emandako heldutasunak aurrera begiratzeko oinarri sendoak ziurtatu dizkio sindikatuari Etxaideren esanetan eta "guk handitzen eta indartzen jarraitu nahi dugunez" sindikatua eta sindikalgintza eraberritu behar delakoan dago. Zer du emateko: sindikalgintza egiteko eta ulertzeko modu berria.

Agerraldiaren amaieran langileei Maiatzaren Lehenean kalera ateratzeko gonbitea luzatu zien. Etxaideren hitzetan "LABek esateko duena entzutera etorri baino, askoz emankorragoa baita langileak eta langileon aldarrikapenak plazara ateratzea, Maiatzaren Lehenean langileok mobilizatzen jarraitzen dugula ikustaraztea".

 

 

 

AZKEN ALBISTEAK | ĂšLTIMAS NOTICIAS

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.

Fekoorren mobilizazio zikloa abiatuko dugu datorren astean

Desgaitasun fisikoa edo/eta organikoa duten pertsonen Bizkaiko Federazio Koordinatzaileko beharginek hitzarmen propioa dute aldarri.
01:41:36

[BIDEOA]: “Zerga-sistema aldatu, aberatsek gehiago ordain dezaten” solasaldia Iruñean, Mikel Aranburu eta Carlos Cruzadorekin

Fiskalitatearen inguruan antolatu dugun lehen solasaldietako lehena izaten ari da orain, Iruñeko Txalaparta liburudendan. Ilargi Jaunarena sindikatuko ekonomialariak gidatuta, Carlos Cruzado “Los ricos no pagan IRPF. Claves para afrontar el debate fiscal” (Capìtan Swing, 2024) liburuaren egilea eta Mikel Aranburu Nafarroako Gobernuko Ogasun kontseilari ohia zerga-politikaz ari dira solasten.