LABek gehiengoa du Maderas de Llodioko enpresa batzordean, bertako 9 ordezkarietatik 5 baititu sindikatuak. Hauxe da enpresa batzordearen oharra:
Joan den irailaren 27an, Maderas de Llodio enpresak hiru lankide kaleratu zituen akusazio faltsu batekin; lan errendimenduaren beherakada leporatuta kaleratu zituen, hain zuzen ere.
Joan den astean bi batzar egin eta gero, enpresa batzordeak eta plantillak kaleratze hauek arbuiatu ditu, eta enpresari eskatu dio kaleratutako lankide hauek berehala berronar ditzala.
Ezin dugu onartu gezurretan oinarritutako inongo kaleratzerik. Ez dago inongo arrazoirik enplegu suntsiketa hau justifikatzeko. Hortaz, plantilla mobilizatzera doa. Bi elkarretaratzera deitu dugu urriaren 7 eta 14rako, astelehena biak. Enpresaren atarian elkartuko gara, 13:00etatik 15:00etara.
Garnicak duela urtebete erosi zuen Maderas de Llodio, eta dagoeneko, denbora epe labur honetan, ikusi dugu zein gutxi inporta zaizkion pertsonak enpresa honi.