2024-02-27
HomeIdazkaritzakIdazkaritza Feminista«MAIATZAK 17» Homofobiaren aurkako Nazioarteko Eguna

«MAIATZAK 17» Homofobiaren aurkako Nazioarteko Eguna

LAB sindikatuak bere egiten du Euskal Herrian LGTBen (lesbiana, gay, transexual, bisexual) askapenerako borroka, bai erakundean bertan, baita gainerako esparruetan ere. Sindikatuak neurri eta proposamen normalizatzaileak eta bazterkeriaren aurkakoak bultzatuko ditu, langile eta herritar guztiontzat eskubideen berdintasuna berma dadin, sexu orientazioagatik bereizketarik onartu gabe.

LABek badu lantalde bat gai hau guztia jorratzen ari dena. Norbaitek kide izan nahi badu, hona harremanetarako helbideak:

emakumeaknafarroa@labsindikatua.org
politikasoziala1@labsindikatua.org

LABen pentsatu dugu premiazkoa dela neurri batzuk hartzea:

– Lehena: erasoak gelditu eta salatu. Jazarpena, ia beti, gutxiren lana da, baina askoren tolerantzia (eta zenbaitetan, adostasuna) izaten du inguruan. Bai batzuen, bai besteen jarrerak aldatzen saiatu behar dugu. Erasotzaileek jakin behar dute inpunitatea bukatu zaiela. Alde horretatik, LABek salaketak bildu, aztertu eta zerbitzu juridikoek berariaz jorratuko dituzte.
Geroago, eta beste sindikatu eta alderdi politikoekin batera, Diskriminazioaren aurkako bulegoa eratzen ahaleginduko da, baita Homofobiaren aurkako behatokia ere, gai hau bereziki tratatzeko.

– LABek prestakizun berezia emanen die bere ordezkariei gai honen inguruan. Ordezkariek erasoen biktimari babesa eman behar diote, eta salaketak bideratzen lagundu.
– LABek homofobiaren gaia eta horren kontrako neurriak zabalduko ditu bere webgunean, triptikoetan, karteletan…
– LABek gai hau larria dela azpimarratzen du: lan giroa pozoitzen du homofobiak, eta ondorioak ditu langileen osasunean eta haien arteko harremanetan.
– LABek kanpainak antolatuko ditu irain homofoboak (eta, oro har, sexistak) baztertzeko. Ez duzu aditu baten bat gaur bertan?
– LABek giro homofiloa sortzeko kanpaina antolatuko du, LGTB jendea babestua sentitzeko eta, nahi izanez gero, lantokian armairutik lasai atera dadin, beldurrik gabe.
– LABek sexu aukera guztiak berdin tratatzeko konpromisoa hartzen du.
– Norberak gauzak nahi bezala adieraztea babestuko du LABek, hots, nahi dituen keinuak eta mintzamoldea erabiltzea.
– LABek langileak animatzen ditu nahi duten itxurarekin eta jantziekin etor daitezen lanera.

Sexu orientazioagatik erasoak dituztenek hona idatz dezakete, nahi izatera:
emakumeaknafarroa@labsindikatua.org; politikasoziala1@labsindikatua.org

Bukatzeko, Euskal Herrian bizi dugun aro berriak zenbait aldaketa ekarriko ditu, ezbairik gabe. LGTBentzat ere izan dadila itxaropide, beharrezkoa baita guztion parte-hartzea.

Euskal Herrian, 2012ko maiatzaren 17an

AZKEN ALBISTEAK | ÚLTIMAS NOTICIAS

Nafarroako Kimiketako hitzarmena adosteko patronalak egin beharreko lanketa bizkor dezan exijitzeko mobilizatuko gara

Azken hilabete luzeetan LAB eta ELA aldarrikatzen ari garen Nafarroako Kimiketako hitzarmenaren lanketaren barnean eta intersindikalak egindako eskaera baten ondorioz, pasa den otsailaren 23 eta 26an bi sindikatuak CEN patronalarekin batzartu ziren, nor bere aldetik. Baina enpresaburuen erantzuna mantso doanez eta, gainera, ez doanez bi sindikatu hauek nahi duten ildotik, martxoaren 1ean elkarretaratzea eginen dute CEN-en Iruñeko egoitzaren parean.

Salicako enpresa-batzordeak erabat gaitzesten du enpresak inposatutako Aldi Baterako Enplegu Erregulazio Espedientea

Kontserba-enpresako enpresa-batzordeak agerraldia egin du Bermeon eta bertan azaldu du, joan den azaroan, beste Aldi Baterako Enplegu Erregulazio Espedientea (ABEEE) bat hasteko asmoa zuela adierazi ziola zuzendaritzak, bigarrena jarraian. Honela, 2023an bezala, Salikako langileak dira berriz ere enpresarako plan estrategikorik ez izatearen ondorioak ordaintzen dituztenak. Berriro ere erabiltzen da ABEEEa “tresna” bezala malgutasun handiagoa izateko bide moduan.

Salatu dugu Ausolanek kanpoko enpresa bat kontratatu duela baja medikoak kontrolatzeko

Ausolan enpresako kolektibitateetarako sukaldaritzako eta garbiketako langileek elkarretaratzea egin dute gaur Espartzan (Nafarroa), enpresaren egoitzaren aitzinean, salatzeko posta elektroniko bidez izan dutela kanpoko enpresa bat kontratatzeko alde bakarreko erabakiaren berri. Kanpoko enpresa horrek langileen baja medikoak kontrolatuko ditu. Erabaki hori ez da sindikatuetako ordezkariekin partekatu ez negoziatu. Langileek aldarrikatu dute diru hori prebentziorako erabiltzea, eta ez kontrolerako.