Abdenabi Mellase libre eta gurekin geldituko da. Ospatzeko moduko gauza da, nahiz eta horretarako Huerta de Peraltako grebalari ohiak Fiskaltzarekin akordioa egin eta gertatu ez zirenak onartu behar izan dituen. Hala azaldu genuen, atzo, Nafarroako Justizia Jauregiaren aurrean Abdenabiren aldeko elkartasun sareko eragileok egindako agerraldian.
Abdenabi Mellaseren aurkako zigor eskaera oso larriak ziren: “autoritatearen kontrako ustezko atentatua” argudiatuz, Fiskaltzak bi urte eta sei hilabeteko espetxe zigorra, 2.500 euroko isuna eta bost urteko kanporatzea eskatu zituen marokiar herritartasuna duen Huerta de Peraltako grebalari ohiarentzat. Gogoan hartu beharra dago Huerta de Peraltako greban zehar Foruzaingoak enpresaren ateetan protesta egiten zuten langileak erasotu eta kolpatu zituela hainbat aldiz; hain zuzen ere, auzipetutako langilea beso batean zauritu zuten foruzainek eta, handik egun batzuetara, bendatutako besoan bertan kolpea eman zioten berriz ere.