LAB Irakaskuntzak salatutakoaren arabera, irailaren 10ean ez dira plaza guztiak atera, eta beraz, postuak bete gabe geratu dira eskolen eta irakasle ordezkoen kalterako.

Ordezkagunearen bidez lanpostuen banaketan egon diren arazoak ikusirik, LABek honako hau salatu nahi du:

Irailaren 10ean ez direla plaza guztiak atera, eta beraz, postuak bete gabe geratu direla eskolen eta irakasle ordezkoen kalterako. Gainera, Lakuatik eskoletako zuzendaritzen gain jarri nahi izan da ardura guztia, Ordezkagunearen kudeaketa txarraren erantzukizuna hartu beharrean.

Postu guztiak ez banatu izanaren ondorioz, plazak ez dira puntuazioaren arabera banatu. Hau da, posturen bat hartu zutenek ezin izan zuten beren puntuazioari zegokion posturik hautatu, eta derrigorrez beren etxetik urrunago zeuden postuak hautatu behar izan dituzte.

Lanaldi murriztuak hautatu zituzten irakasleen kexak ere iritsi zaizkigu: murriztu guztietan %66ko lanaldia zela jartzen zuen hala izan gabe ere. Hori dela eta irakasle askok eskolara joandakoan jakin du lanpostuaren lanaldia murritzagoa zela. Egoera honen aurrean Lakuak lanpostuei uko egiteko aukera zabaldu du berriro ere Ordezkagunean aktibo jarri ahal izateko.