Aurten ere LABek Maiatzaren Leheneko mobilizazio sindikal handiena burutu du, Euskal Herria osoan 28 manifestazio eginez. Nafarroan 7250 lagunek parte hartu dute, Iruñean 5500, Tuteran 250, Tafallan 300, Lizarran 450, Irunberrin 150, Altsasun 300 eta Donezteben 300 izandako deialdietan.

Manifestazio nagusiena 12:00etan abiatu da Gaztelu Plazatik, beste horrenbeste borroka eremu ordezkatzen duten bost blokez osatuta: Zerbitzu pribatuak; Industria; Zerbitzu Publikoak; Gazte, langabe eta prekarioak; eta Pentsiodunak. Manifestazio amaierako ohiko mitinaren ordez, bloke bakoitzeko ordezkari banak hartu du hitza Gaztelu Plazako Kioskotik, eguneroko borroka sindikalaren garrantzia nabarmenduz. Manifestazioa txalapartaren doinuen artean sartu da Gaztelu Plazara eta jarraian txalapartari eta epaiketa politikoetan auziperatutako lagunek (tartean epai zai dauden gazte independentistak) jazarpenaren amaiera eta eskubide zibilen errespetua eskatu dute txalo artean.

Iruñeko martxa hasi aurretik, Nafarroako LABeko bozeramaileak “Euskal Herrian, Nafarroan, emergentzia sozialeko egoera” bizi dugula nabarmendu du, “Troikak idatzitako eta Espainiar eta Frantziar Gobernuek euskal langileriari inposatutako gidoiaren ondorioz”. Egoera honen aurrean, Igor Arroyok mezu baikorra zabaldu du “Nafarroan ideien bataila irabazi baitugu: gehiengo sozial batek erregimen ustelaren amaiera nahiz eredu ekonomiko eta sozial berri baten sorrera eskatzen du, gardentasunean, benetako demokrazian eta langileriaren beharretan oinarritutakoa. Elite ustelak Madrilen laguntza behar izan du, 82an Hobekuntzarekin bezala, nafar Herriaren borondatearen kontrako erabakia inposatzeko. Alabaina, gero eta oztopo handiagoak jarri, orduan eta indar handiagoa hartuko du aldaketaren aldeko uholde sozialak. Kolokan dago eskuin Espainiazalearen hegemonia Nafarroan; hegemonia berria aitzinarazteko garaia da, langileriarena”.
 

 

 

ERLAZIONATUTAKO ARTIKULUAKIDAZLEAREN GEHIAGO