2023-12-10
HomeZerbitzu PublikoakGarraioaLABek Metro Bilbaok garraio publikoa pribatizatzeko proiektuetara baliabide publikoak bideratzen dituela salatzen...

LABek Metro Bilbaok garraio publikoa pribatizatzeko proiektuetara baliabide publikoak bideratzen dituela salatzen du

Metro Bilbaok eta ADO/Avanza taldeak Lisboarako egin berri duten akordioak baliabide publikoak eskaintzen dizkio garraio emakiden nazioarteko tarte pribatu bati. LABek Eusko Jaurlaritzari eskatzen dio ez uzteko herritarrek ordaindutako giza baliabideak edo diruak horrelako proiektutara bideratzen.

Atzo, uztailak 14, jakinarazi zen Metro Bilbaoren eta ADO/Avanza enpresa taldearen arteko akordioa Lisboako metropoliko garraio-sistema, autobusak eta metroa, ustiatzeko emakida jaso eta gero.

Eneko Arruebarrenaren zuzendaritza taldeak, Eusko Jaurlaritzako Garraio Sailburuordearekin batera, ez du inolako erreparorik izan garraio pribatuen ustiapenerako nazioarteko talde garrantzitsuenetako baten arduradunekin argazkia egiteko.

LAB sindikatuak kritikatzen du lankidetza “publiko-pribatu” honekin Metro Bilbao enpresa pribatuen eskuetan jartzen ari dela EAEko erakunde eta herritarren diru publikoarekin finantzatutako kudeaketa eredua. Horrela garraioen emakida pribatuak enpresa multinazional eta filosofia neoliberalekoek hartzea sustatzen ari dira, herritarren mugikortasunaren beharretan oinarritutako kudeaketa publikoaren kaltetan. Eusko Jaurlaritzak eta Metro Bilbaok baliabide publikoak esku pribatuetan jartzen dituzte pertsona eta enpresa gutxi batzuen mozkinak jendartearen ongiaren gainetik lehenetsiz.

LABek gogoratzen du garraio sisteman liberalizazioak eta pribatizazioak eragin zuzena duela pertsonen lan baldintzetan eta zerbitzuen kalitatean. Pribatizazioak kaleratzeak, lan baldintzak okertzea, segurtasuna gutxitzea, zerbitzuak kanporatzea ekarri ohi ditu, prezioak garestitzeaz eta erabiltzaileentzako zerbitzu eskasagoaz gain.

Horregatik guztiarengatik, LABek salatzen du EAEko erakundeek, Metro Bilbao bezalako enpresa publiko baten bitartez, garraio sistema pribatuak diru publikoz finantzatzen ari direla.

LABek eskari eta dei zuzena egiten die alderdi politikoei eta, bereziki Gasteiz eta Iruñeko Gobernuei, ez dezaten zerbitzu publikoen pribatizazio eta liberalizaziorik babestu, eta egin dezaten denon interesaren alde.

LAB sindikatutik garraio sare publikoa eraikitzearen aldeko apustua egiten dugu, herri gisa eta langile gisa ditugun beharren neurrira, multinazional eta enpresa pribatuetatik aske eta herritar guztien mugikortasunaren onerako.

 

 

 

AZKEN ALBISTEAK | ÚLTIMAS NOTICIAS

Lizarran erditzeko zerbitzua itxi izana Osasun Departamentuaren aurreikuspenik ezari egozten diogu, haren utzikeria eskualdeko osasun zerbitzu publikoak desegiten ari baita

LAB sindikatuan hilabeteak daramatzagu Lizarrako Osasun Barrutiko osasun zerbitzu publikoen egoera larria salatzen, eta duela aste batzuk informazio kanpaina bat egin genuen datu ofizialen bidez frogatzen zuena Estellerriko herritarrak sufritzen ari direna egiazkoa dela, eta ez sentsazio hutsa. Orain, aurreko gerentearen kudeaketa tamalgarriak eta Osasun Departamentuaren ekimenik ezak eskualdeko ospitalea erditzeko zerbitzurik gabe utzi dute, zerbitzua berreskuratzeko datarik gabe, bere garaian etxeko ospitalizazioarekin gertatu zen bezalaxe.

Estatuan baino gutxiago ordaindu beharko dutenez, Fortuna Handien gaineko Zergaren inguruko akordioak patronalari eta kapital errentei mesede egiten die

Ditugun eskumenak presio fiskala areagotu eta zerga sistema sakonki eraldatzeko baliatu behar direla uste dugu LAB sindikatuan. Hala, EAJ-PSEren gobernuak Elkarrekin Podemosekin egindako akordioa ez da inondik inora ere nahikoa, eta kontrako norabidean doa.

Salatzen dugu atzo Erandion hildako langileak 66 urte zituela eta bakarrik ari zela soldadura lanak egiten

Lankide, senitarteko zein lagunei elkartasuna adierazteaz gain, lan-erreformek prekaritatea areagotu baino ez dutela egin nabarmendu du sindikatuak, lan-osasuna bermatu behar duten instituzioek gaiarekiko duten axolagabekeria kritikatzeaz gain.