LABek Estatu Batuen eta beste herrialde inperialista batzuen Siria erasotzeko nahia salatzen du

LABek kanpaina mediatiko hau salatzen du, goian aipaturiko gobernuen nahi inperialistekin batera.

Siriar Estatuaren etorkizuna siriar herriak erabaki behar du, inolako atzerriko esku hartze edo interbentziorik gabe. Era berean, Siriar Estatuak, herri kurduaren eskubide sozial, politiko eta ekonomikoak bermatu behar ditu, izan ere, bi milioi kurdu estatu Siriarreko iparraldean bizi dira, eta historikoki bere autodeterminazio eskubidea, eta beren eskubide politiko, kultural eta hizkuntza eskubideak urratuak izan dira; egoera hau ere salatzen du LABek. Era berean, gaur egun oposizio kurduak, siriar herriaren zati handi batek bezala, bereziki bertako gutxiengo kristauak, jazarpena eta hilketa sumarioak jasaten dituzte ELS deritzonaren eta Al Nusrako fronteko errebeldeen aldetik. Hauen oinarrizko helburuetako bat erregimen islamista integrista ezartzea da Siria bezalako estatu laiko batean eta aipatu den Kurdistaneko aldean, Pertsiar Golkoko erregimen wahabi absolutisten laguntzarekin, bereziki Saudi Arabiaren sostenguarekin, Estatu Batuen aliatu historikoa.

Siriar herria eta herri kurdua izan behar dira euren etorkizunaren jabe bakarrak. Ezin daiteke iraganeko eskema kolonialistetara bueltatu. Siriaren aurkako erasoa, gerora Iran eta Libano erasotzeko atarikoa litzateke eta horrela, Ekialde Ertainean erregimen titereak ezarri Estatu Batuen, Israelen eta Europar Batasunaren interes inperialistak defendatzeko. Egoera honen aurrean, munduko herriok eta langile klaseak ezin gara egon ezer egin gabe. Ez dago tarteko biderik.

LABetik dei egiten dugu herri burujabe honen aurka izan daitezkeen erasoen aurrean deitzen diren mobilizazioetan parte hartzera, eta gure elkartasuna adierazi nahi diegu siriar eta kurdu herriei eta bertako langileriari.