Nafarroako LAB administrazioko ordezkariak prentsaurrean.

2102ko 14. ordainsaria berreskuratzeko jorratu beharreko bidea aurkeztu du gaur Nafarroako LAB administrazioko ordezkariek. Ekimenen sorta hauen muina Nafarroako Gobernuaren akordioari helegite kolektibo bat aurkeztea izango da. Lan honetan, mobilizazio soziala bultzatzea eta akordio politiko eta sozialak berebiziko garrantzia hartuko dute.

Azterketa eta gogoeta tarte baten ondoren, 2012ko 14. paga berreskuratzeko estrategia finkatu du LABek, honako hiru ardatz hauetan oinarritzen dena:

1. Helegite kolektiboa
Lehenik eta behin, LABek epaitegietan borrokatuko du paga berreskuratzeko, Tribunal Contencioso-Administrativo delakoan paga ezabatu zuen Nafarroako Gobernuaren akordioaren kontrako helegitea aurkeztuz. Helegite hau aipatutako akordioa argitaratzen den unean sartuko dugu eta orain arte Gobernuak ez du argitaratu.

Sindikatu batzuk erreklamazio eta helegite indibidualak sustatzen ari dira, baina administrazioak baztertuko ditu inongo zalantzarik gabe. Bide honetatik jotzen duten langileak instantzia judizialen aurrean erreklamazioa aurkeztera behartuak egongo dira eta honek erreklamatzaileei sekulako gastuak suposatuko dizkie. Kasu honetan, aipatu langile hauek prozedurarekin aurrera egiteari uko eginez gero, interesen kontrako epai mugiezina ebazten bada nahi ez dugun efektua gerta daiteke, helegiterik aurkeztu ez denez onartutako egintzatzat hartu baitaiteke. Honen aurrean, irtenbiderik sendo eta argiena Akordioa bera errekurritzea eta baliogabetzat jotzea da, honek kaltetutako pertsonal guztiengan eragina izanen duelarik banakako errekurtsorik aurkezteko beharrik gabe.

Honela bada, LAB hainbat sindikaturen oportunismotik aldentzea erabaki du. Sindikatu hauek helegite indibidualak sustatzen ari dira afiliazio kanpaina egiteko.

2. Mobilizazio soziala
Bigarrenik, LABek mobilizazio soziala proposatzen du, pagarena ez baita afera juridiko hutsa, baizik eta UPN-PPk langileen eskubideen kontra eta Nafarroako Parlamentuaren borondatearen kontra hartutako erabaki politikoa. Borroka bere fruituak ematen ari da eta ezinbestekoa da Barcina eta Rajoyren murrizketak gelditzeko. Ildo honetan, UPNren Gobernuaren dimisioa lortzeko presio soziala areagotzea proposatzen du. Izan ere, UPNren Gobernua gehiengo sozialaren aurka ari da, langileen eskubideak mespretxatzen ditu, Nafarroako Parlamentuari entzungor egiten dio eta Madrilen erabakiei men.

3. Akordio politiko eta soziala
Hirugarrenik, 14. paga defendatzeko eta oro har murrizketei aurre egiteko Akordio politiko eta soziala defendatzen du LABek, Nafarroako Parlamentuaren erabakia oinarri hartuta instituzio guztietan garatuko dena. Ildo honetan, LABek paga ordaindu duten udaletxe ugarien jarrera txalotzen du; balizko Gobernu berriak ezabatutako paga berreskuratu beharko lukeela planteatzen dio oposizioari; eta azkenik, Espainiako Gobernuak Parlamentuaren borondatearen kontra edota borondate hori aintzat hartu duten udalen kontra jo nahiko balu, Herri bezala erantzuteko deia egiten du.  

 

LAB SAREAN
{module[111]}