LAB sindikatuak lanuzteak deitu ditu martxoaren 28an eta apirilaren 4 eta 11n, Bizkaiko Arrain Kontserba eta Gazigintzako sektoreko enpresa guztietan herrialdeko hitzarmenaren alde.

Lanuzte desberdinak egingo dira (enpresa bakoitzean erabakiko delarik iraupena), guztiak 11:30 – 12:30 tartean, martxoaren 28an nahiz apirilaren 4 eta 11n. Bizkaiko kontserberetako langileei, gehienak emakumeak, uztailaren 7tik aurrera, eta PPko gobernuak inposaturiko lan erreforma baliatuz, lan baldintzak kaskartu egin dizkiete. Patronalak, adibidez Campos, Zallo, Ortiz, …, aldebakartasunez estatu mailako hitzarmena aplikatzeko erabakia hartu dute, eta bertako langileak zituzten lan eskubideak ez dira errespetatzen. Zituzten IT osagarriak, lizentziak, urteko ordu kopurua, eta kontratazio berriei soldata ere, estatuko hitzarmenak ezarritakoari jarraituz egiten dira.

Egoera hau berez oso prekarioak ziren lan baldintza batzuen okertzea baino ez du ekartzen, adibidez 900 € soldatak, lan oso gogorra, …, eta egoera honek langile profil oso zehatza dutenei kaltetzen die, batez ere emakumea eta produkzioan lan egiten duenari.

LABen argi dugu irtenbidea badagoela eta honen alde borrokatzen jarraitu behar dugula; berebiziko garrantzia duen herrialdeko hitzarmena aldarrikatuko du LABek lanuzte hauen bidez, sektore honetako langileeek bizi duten egoera salatzearekin batera.

Halaber, Jaurlaritzari eta gainerako instituzio eta alderdiei dei egiten diegu, gisa honetako egoeren aurrean, Euskal Herriko langileen lan baldintzak arautzen dituzten hitzarmen kolektiboen defentsan, apustu egin dezaten eta urratsak eraginkorrak eman, Lan Harremanen Euskal Esparruaren alde.
 

 

 

ERLAZIONATUTAKO ARTIKULUAKIDAZLEAREN GEHIAGO