Artxiboen Nazioarteko zazpigarren Astea dela eta, sektoreko langileak, Nafarroako Gobernuak azpikontrataturiko enpresetakoak, mobilizatzen ari dira beren lana aitortu eta baldintzak duinduko dituen hitzarmen sektorial baten beharra ikusarazteko. LABek aldarrikapen hori babesten du eta enpresei eta Gobernuari dei egiten die negoziazio mahai bat sortzen luzamendurik gabe lagun dezaten
Asteazken honetatik, Nafarroako Gobernuaren artxiboek bat egin dute Artxiboen Nazioarteko zazpigarren Astearen ospakizunarekin. Foru administrazioak azpikontrataturiko langileak lehenak dira gure herrialdearen ondare dokumentalaren balio kulturala aitortzen, baina ez daude ados ezartzen zaizkien baldintzekin. Nafarroako Artxiboen eta Dokumentu Ondarearen Zerbitzuak zerbitzua externalizatuz funtzionatzen baitu, eta horretan titulazio sorta zabala eskatzen dute gutxieneko soldataren truke. Hori da errealitate gordina non zaharberritzaile, artxiboko teknikari eta liburuzain bezalako profilek ahal duten moduan bizirauten duten.
Egoera hori arautu eta hobetu ahal izateko, langileek eta LAB sindikatuak iaztik daramate lanean eta aldarrikatzen hitzarmen sektorial baten beharra, ez bakarrik lan baldintzak duintzeko, baizik eta ofizioaren garrantzia aitortzeko eta herritarrei eskaintzen zaien zerbitzuak dagokion kalitatearekin funtzionatzea posible egiteko.
Gauzak horrela, langileek dei egiten diete sektorearen parte diren enpresei eta Nafarroako Gobernuari berari, administrazioak azpikontrataturiko enpresen parte diren heinean, prekarizazioa ezabatzeko eta lanbidea duintzeko hitzarmenaren negoziazio prozesua babestu eta laguntzeko.
LABek lehen saiakera egin zuen maiatzaren 20an negoziazio mahai bat sortzeko, baina enpresen aldetik ez zuen babes handirik izan. Ekainaren 20rako bertze deialdi bat egonen da. Espero izatekoa da oraingoan bai bertaratuko direla eta lagunduko dutela artxibozain eta liburuzainen lana aitortzeko eta duintzeko bide horretan.