LAB sindikatutik irmoki salatu nahi dugu Rafa Diezi, aurretik harekin batera BATERAGUNE auzian epaitutako Arnaldo Otegi, Sonia Jacinto, Miren Zabaleta eta Arkaitz Rodriguezen kasuan egin bezala, ezarritako zigorra berresteko Epaitegi Konstituzionalak hartu duen erabakia.
Espainiako botere judizialean ez dago justiziarik. Auzitegiak Madrilgo Gobernuak kudeatutako ordainleku politikoak dira, botere exekutiboren morrontza lanetan dihardutenak. Euskal Herrian gatazka politikoa gainditzeko bost lagun hauek jokatutako papera eta egindako ekarpena kontuan hartuta, are larriagoa da zigorra. Aski ezaguna dugu Diez, Otegi, Jacinto, Zabaleta, eta Rodriguezek bake eta konponbide prozesuak aurrera egin dezan bete duten papera. Haiek espetxean mantentzean mendekuzko politikaren emaitza ankerra dela, probokazio hutsa, eta iseka, euskal gizartearen inteligentzia kolektiboari.
Estatua ez dago prest aldaketak ekarriko dituen prozesu demokratiko batean sartzeko. Neurririk zitalenekin, egun hauetan ikusten ari garen moduan, euskal herritarren aurkako epaiketa politikoak abiaraziz, eskubide zibil eta politikoen kontrako erasoaldian jarraitzen du.
Euskal eragile politiko, sozial eta sindikalon eskutik eta euskal jendartearen mobilizazioarekin lortu behar dugu, eta lortuko dugu, bake prozesuan aurrera egitea. Beraz, epaia salatzearekin batera deia bat ere egin nahi dugu LABetik: datorren urriaren 11rako Elgoibarren deitu den manifestazioan parte hartzeko deia egiten diegu langile eta herritar guztiei.
Bateragune auzian zigortutako bost lagunak baldintzarik gabe lehenbaileen aske uztea eskatzen dugu LABetik. Rafa Diezi, Arnaldo Otegiri, Sonia Jacintori, Miren Zabaletari, Arkaitz Rodriguezi, eta haien senitarteko guztiei, gure babesa eta elkartasunik beroena helarazi nahi diegu.
Donostian, 2014ko irailaren 27an
