Ikasturteko lehen Nazio Biltzarrean hartutako hainbat erabakiren berri eman du LABek gaur eman duen prentsaurrekoan. Epealdi trinkoan murgildurik, Hauteskunde Sindikalek berebiziko garrantzia izango dutela adierazi du, baina honekin batera, politikoki garai berri bati ateak irekitzeko aukerak inoiz baino argiagoak diren honetan, LABek langileok protagonistak izan gaitezen lanean izango dela esan du.
Erabakitzeko Eskubidea agendaren erdi erdian kokatzen du LABek eta gero eta atxikimendu sozial handiagorekin, Kataluniako prozesuak markatzen duela eztabaida adierazi du. Eskozia ere ez du ahaztu nahi izan, erabakitzeko eskubidearen hauspoak harrotu dituena eta ez dena biharko emaitzekin bukatuko. Sindikatuarentzat Erabakitzeko eskubidea gatazka politikoak konpontzeko tresnarik demokratikoena eta eraginkorrena da.
LABentzat hutsegite historikoa litzateke Euskal Herriaren etorkizunaz erabakitzeko aukera eta ahalmena Madrilen boterea eta estatu osoan duen kontrola handitzea bilatzen duen erreforma kontituzionalaren esku uztea.
LABek giltza konpromiso politikoetan eta mobilizazio sozialean kokatzen du. Parlamentuan dagoen gehiengo zabalarekin, UPN-PSN behingoz gobernutik botatzeko alternatiba sendo bat artikulatzeko gai bagara eta erabakitzeko eskubidea aldarrikatzen dugun gehiengo sindikal eta sozialen lanarekin lor daitekeenaren ustean dago.
LABentzat egoerak aukera handiak eskaintzen ditu: adierazpen bateratua hemen Eskoziako bidearen aurrean, erantzun zabal eta bateratua Konstituzionalak ezetz badio Katalunian, akordio politikoak erabakitzeko eskubidea borrokatzeko erreformaren testuinguruan…
LABek salaketa lan mundura eramango duela adierazi du eta erabakitzeko eskubidearen aldeko borroka sindikatuon eskutik indartzeko proposamenak egingo dituela iragarri du.