Euskal Herriko hainbat kultur sortzailek proposatutako deialdiarekin bat egiten dugu. LAB sindikatuak ez du euskal kulturgintzarik gabeko Euskal Herririk imajinatzen. Ezta nahi ere. Langile sortzaileen lana ezinbestekotzat dugu jendarte askeago bat eraikitzeko bidean. Defendatzen dugun bizitza duinaren parte da kultura.
Euskal Herri luze-zabalean sakabanatutako aktore, bertsolari, dantzari, idazle, komikilari, musikari… kultur sortzaile orori gure babes osoa publikoki adierazi nahi diogu. Baita, sortzaileen lana jendarteratzea posible egiten duten antzoki langile, liburuzain edota orokorrean kulturguneetako lana ogibide duten langile guztiei.
Ekimenak agertutako helburuei jarraiki, hemen LABen konpromisoak:
1.- Gogoeta eta eztabaida soziala eragitea
Prest gaude eragile aktibo izateko, gure kultur ondasunak merezi duen balioa izan dezan eta langileen baldintzak duintzeko.
2.- Premiazko neurriak hartu behar direla exijitzea
Prest gaude erakunde publikoei kultur langileekin batera presioa egiteko, hartu beharreko premiazko neurrien inguruan hausnartu eta interpelazio zuzena egiteko.
3.- Euskal kulturgintzaren ekosistema osatzen dugun guztion elkargunea izango den mahai/bilera/topaketa antolatzeko lanean hastea
Prest gaude antolakuntza prozesu horretan bidelagun izateko, bai eta sortzen den horretan eragile aktibo bat izateko, sindikatuaren jakintza kolektiboa langile sortzaileen esku jarriz.
Euskal Herrian baditugu eskumenak gure kultura babestu eta zaintzeko. Borondate politikoa falta da. Arazoa ez da COVID-19arekin sortu krisia, arazoa sistema da, kultura mespretxatzen, gutxiesten duen sistema. Beharrezkoa da kapitalaren aurretik bizitzak jartzea, eta horrek, ezinbestean, kulturari dagokion balioa eta tokia ematen hastea eskatzen du.
Beraz, hartu beharreko erabakiak bi norabidekoak izan behar direla uste dugu:
-Batetik, epe labur-ertainera begirakoak, alarma egoerak eragindako kalteak aintzat hartuko dituztenak, sortzaileen gutxieneko soldata bermatzeko modukoak.
-Bestetik, epe luzera begirakoak, ezinbestean aldaketa estrukturalak ekarri behar dituztenak, kultura egin eta kontsumitzeko orduan.
LAB sindikatua greba digitalarekin bat.