2024-04-20
HomeZerbitzu PublikoakUdal eta Foru AdministrazioaKontrol zorrotza eskatzen dugu COVID-19a dela-eta egindako aparteko orduak ordaintzeari begira

Kontrol zorrotza eskatzen dugu COVID-19a dela-eta egindako aparteko orduak ordaintzeari begira

Nafarroako Gobernuak abuztuaren 17ko 8/2020 Foru Lege-dekretua onetsi berri du, COVID-19ak eragindako pandemiarekin zerikusia duten hainbat alderdi arautzen dituena. Bertan, besteak beste, onartzen da krisialdian egindako aparteko orduak ordaintzea dedikazio esklusiboaren osagarria kobratzen duten langileei, orain arte bateraezina baitzen. LABetik eskatzen dugu ordu horiek ahalik eta gehien kontrolatzea, esker oneko urdailei ordaintzeko zirrikitu bat izan ez dadin.

Aitortzen dugu osasun-krisialdi honetan langile publiko ugarik aparteko lana egin dutela. Langile horiei eskerrak eman nahi dizkiegu egin duten ahaleginagatik, eta zuzena iruditzen zaigu behar bezala ordaintzea ahalegin hori.

Foru lege-dekretuaren zioen azalpena irakurrita, imajinatzen dugu helburu nagusia dela Administrazio Erroko fakultaboei ere ordaintzea Osasunbideko fakultatiboek kobratzen duten produktibitate-saria (hau da, aparteko orduak), eta, hala, gertatzen den konparaziozko bidegabekeria hori ezabatzea, nahiz eta arauaren artikuluetan ez diren lanpostu zehatzak aipatzen.

Dedikazio esklusiboaren osagarriaren esleipena administrazioko langileen artean hautsak harrotzen dituen gaia da. Langile horiek aparteko orduak kobratu ahal izateko aukera zabaltzea kontu delikatua izan daiteke, nahiz eta bide hori COVID-19aren ondorioz ireki.

Gaur egun, 351 pertsona dira Foru Administrazioan dedikazio esklusiboaren osagarria kobratzen dutenak. Foru lege-dekretua idatzita dagoen bezala, 12. artikuluan, ez da bereizketarik egiten langile horien guztien artean, eta denek aparteko orduak kobratzeko bidea irekitzen du.

LABen iritziz, oso zorrotz eta gardenki jokatu behar da kontu horrekin, eta langile guztiei aitortu behar zaie egindako aparteko lana. Baina, aldi berean, aitortu behar dugu ez garela fidatzen nagusi batzuek egin ditzaketen justifikazioekin.

Alde horretatik, Nafarroako Gobernuari eskatzen diogu bidal diezagutela ordainsari hori jasoko duten langileen zerrenda eta bakoitzaren diru-zenbateko zehatza, baita kobraketa justifikatzen duen arrazoia ere.

AZKEN ALBISTEAK | ÚLTIMAS NOTICIAS

LABek ez du sinatu EAEko anbulantzietako aurreakordioa, hilabete luzetako borrokan planteatutako gutxieneko hobekuntzak ez baititu jasotzen

Anbulantzietako langileentzat Osakidetzako lankideekiko homologazioa eta soldataz haragoko bestelako hobekuntzak alde batera utzi dituzte azken asteetan LABi bizkar emanda aritu diren ELA, CCOO eta UGTk. LABek ez du sinatu aurreakordioa.

Patronalaren eta instituzioen utzikeriak dirauen bitartean prekaritateak hiltzen jarraitzen duela salatu dugu Gasteizen

Iragan asteburuan bi Euskal langileren heriotzen berri izan dugu, garraiolari bat Lleidan eta langile autonomo batena, Gasteizen. Gure elkartasuna eta besarkada beroena hurbilekoei.

Euskal Herriko Pentsiodunen Mugimenduak iragarritako Herri Ekimen Legegileari babesa adierazi dio LABek, gutxieneko pentsioak 1080 eurotara premiaz osagarritu daitezen

Atzo, apirilak 19, milaka euskal pentsiodun atera ziren kalera. Gasteizen egindako mobilizazioan, 1080 eurotako gutxieneko pentsioa behingoz berma dadin 170 udaletan baino gehiagotan aurkeztutako mozioak izan zituzten hizpide, baita horren segida izango den lantzen dabiltzan Legez besteko Proposamena ere. LABek mugimenduaren aldarriekin bat egiten du eta ekimen berri hau babesten duela adierazi du.