2024-02-28
HomeEkintza SozialaKalera aterako gara politikak aldatzera behartzeko

Kalera aterako gara politikak aldatzera behartzeko


LAB eta ELA sindikatuok agerraldia eskaini dugu Hego Euskal Herrian zein Madrilen adosten ari diren aurrekontuak salatu eta hauen aurrean mobilizazioa suspertzeko beharra aldarrikatzeko. Ainhoa Etxaide, LABeko Idazkari Nagusiaren esanetan “aurrekontu hauen aurka gauden guztiak kalera aterako gara ziur gaudelako egoera eta eztabaida soziala kontrolatzeko aukera kentzea dela egin dezakegun hoberena”.

EAE eta Madrilen osatu berri diren gobernuek azken urteetako politikak aldarrikatu dituzte, egonkortasuna jarri dute lehentasun gisa. Eta markatu duten helburu horri erantzutekoa ustezko ezkerra izan dute aliatu. Bi Gobernuek aurrera eraman nahi dituzten proiektuek “murrizketa gehieago” ekarriko dituzte langileentzat Etxaideren aburuz.

Egoera hau aldatzeko helburuz LAB eta ELA sindikatuak “kalera aterako gara”. Mobilizazioa ezinbestekoa da aurrekontu hauek egiteko eta justifikatzeko diskurtsoarekin izkutatzen duten errealitatea plazaratzeko, aurrekontu hauek bazterrean uzten dituzten guzti guztiak eztabaida politikoaren erdian jartzeko eta aurrekontu hauen atzean dagoen proiektu politiko eta ekonomikoaren kontra jende asko dagoela erakusteko.

Politika sozioekonomikoak aldatzeko Programa Sozial bat duen mugimendu bat gara eta jarduera eta agenda instituzionala baldintzatzeko asmoa dugu. Politikak aldatzera behartu nahi ditugu. Bide hori elkarlanean jorratu nahi dugu, “Karta sozialaren baitan Euskal Herri berri bat eraiki nahi duen gehiengo hori antolatu eta martxan jartzera goaz.

AINHOA ETXAIDE, LABeko IDAZKARI NAGUSIAren INTERBENTZIOA

"Kritikatu nahi dugun lehenengo gauza bi gobernuen artean dagoen parekotasuna (EAE zein Madril), PNV eta PPk egin dutenaren inguruan dagoen parekotasuna.

Biek azken urteetako politikak aldarrikatu dituzte eta egonkortasuna jarri dute lehentasun gisa. Egonkortasuna, ulertuta hori dela politika berdinak egiten jarraitzeko gehiengo instituzionala edukitzea. Alegia, aritmetika instituzionala kontrolatzea.

Madrilgo Gobernuak zein Gasteizkoak guztiz konpartitzen dute ere momentuaren irakurketa, sistema zaintzea eta babestea. Bi gobernuen arteko adostasuna eta giro ona posible da PNVren eta PPren gobernuak euren proiektuetan bat datozelako, hain zuen ere.

Bi Gobernuen sintonia hasiera hasieratik ikusten ari garen akordio ekonomikoetan atzematen da: defizit topea. PNVk adostu du Madrileko Gobernuarekin EAEko erkidego autonomo bat gehiago dela, gainontzekoen berdina. Akordio hau ote da autogobernuaren aurrean Jaurlaritzak egingo duenaren erakusle?

Guretzat horrek guztiak esan nahi du murrizketa gehiago datorkigula babes sozialaren maila gero eta txikiagoa izan dela, alegia. Eta ez aberastasuna sortzen ez delako, baizik eta sortzen denaren zati geroz eta handiagoa joango delako kapitalaren eskuetara, enpresa handietara, bankeetxetako jabeetara. Joango egingo da soldata bidez, horiek ere gainbeheran direlako. Eta joan egingo da aurrekontuen bidez, batez ere politika fiskalaren bidez, ez delako aberastasuna banatzen.

Ez ditugu PNVren aurrekontuak ezagutzen baina ikusten ari gara nolakoa izaten ari den aurrekontuak egiteko bidea:

1. Lehenengo kontuak egin ditu bertako enpresari nagusiekin politika fiskala finkatzeko. Enpresa handien interesak jasotzen dira hasieratik.

2. Bigarrenik kontuak egin ditu Estatuarekin. Estatuan eta estatu politika hauetan kabida izango duten aurrekontuak izango dira zalantzarik gabe.

3. Hirugarrenik kontuak egingo dira sistema finantzieroarekin, zorra eta interesak ordaintzeko partida zehaztuz bestelakoetan sartu aurretik. Banketxeak gastu sozialaren aurretik jarriko dituzte.

4. Inbertsio ekonomikoak izango dira laugarrenak. Ikerketan eta inbertsioetan behera egingo da eta AHTak izango du lehentasuna.

Ondoan dugu Nafarroako Gobernua ere. Haren printzipioa da aldaketa lasai eta erosoa egitea. Egoera aldatzeko azken urteetako erreformak eta neurriak atzera bota behar dira, egoera aldatzeko herriaren gehiangoaren aldeko desoreka argia egin behar da aurrekontuetan.

Ez dugu auzitan jartzen gauzak aldatzeko aldarrikatzen den borondate politikoa, baina onartutako defizitarekin eta fiskalitatea benetan ikutu gabe ez dago aldaketarik politiketan.

LAB eta ELAk mobilizazioaren bidea suspertzera goaz
Eztabaida politikoa lokartu nahi dute inposatu dizkiguten erreforma guztiak sendotzeko eta atzeraezinak egiteko. Eztabaida sozialik gabeko Herria nahi dute, horrek ziurtatzen duelako benetan egonkortasun instituzionala. Gehiengo nahikoak instituzioetan eta gehiengo isilak kaleetan. Gure eskutan dagoena egitera goaz bi gauza hauek ekiditeko.

Kalera aterako gara:

– Aurrekontu hauek egiteko eta justifikatzeko diskurtsoarekin ezkutatzen duten errealitatea plazara atera behar delako.
– Aurrekontu hauek bazterrean uzten dituzten guzti guztiak eztabaida politikoaren erdian jarri nahi ditugulako.
– Aurrekontu hauen atzean dagoen proiektu politiko eta ekonomikoaren kontra jende asko dagoela erakutsi nahi dugulako.
– Kalera aterako gara ziur gaudelako egoera eta eztabadia soziala kontrolatzeko aukera kentzea dela egin dezakegun hoberena, politikak aldatzeko bideari ateak irekitzeko.

Gure asmoa da jarduera eta agenda instituzionala baldintzatzea da, politikak aldatzera behartzea. Bide baten emaitza izango da, badakigu. Bide hori egin nahi dugu, elkarlanean, langileak batuz borroka honetara, eragile sozialekin bat eginez borroka honetan.

Bi tresna ditugu horretarako:

– 2013an karta soziala egin genuen 100tik gora eragileren artean. Mobilizazio eta ekimen asko burutu ditugu orduz geroztik. Gehiengo sozial berri bat osatzeko gai izango den mugimendu soziolaborala osatzeko tresna da. gu ziur gaude herriaren gehiengo handi batek egiten duela bat karta sozialean marraztu dugun Euskal Herri berriarekin. Gehiengo hori antolatzeko eta martxan jartzeko lan egitera goaz.

– Programa soziala. Politika sozioekonomikoak aldatzeko programa bat duen mugimendu bat gara. Programa horretan jasotzen diren politika guztiak egingarriak dira. Egoera sozialak justifikatzen ditu. Arrazoia dugu, indarra da falta zaiguna. Indarra mobilizazioak eta langileak antolatzeak emango digu. ELA eta LABen arteko elkarlana funtsezkoa izango da patronalaren politikak borrokatzeko."

 

 

 

AZKEN ALBISTEAK | ÚLTIMAS NOTICIAS

Nafarroako Kimiketako hitzarmena adosteko patronalak egin beharreko lanketa bizkor dezan exijitzeko mobilizatuko gara

Azken hilabete luzeetan LAB eta ELA aldarrikatzen ari garen Nafarroako Kimiketako hitzarmenaren lanketaren barnean eta intersindikalak egindako eskaera baten ondorioz, pasa den otsailaren 23 eta 26an bi sindikatuak CEN patronalarekin batzartu ziren, nor bere aldetik. Baina enpresaburuen erantzuna mantso doanez eta, gainera, ez doanez bi sindikatu hauek nahi duten ildotik, martxoaren 1ean elkarretaratzea eginen dute CEN-en Iruñeko egoitzaren parean.

Salicako enpresa-batzordeak erabat gaitzesten du enpresak inposatutako Aldi Baterako Enplegu Erregulazio Espedientea

Kontserba-enpresako enpresa-batzordeak agerraldia egin du Bermeon eta bertan azaldu du, joan den azaroan, beste Aldi Baterako Enplegu Erregulazio Espedientea (ABEEE) bat hasteko asmoa zuela adierazi ziola zuzendaritzak, bigarrena jarraian. Honela, 2023an bezala, Salikako langileak dira berriz ere enpresarako plan estrategikorik ez izatearen ondorioak ordaintzen dituztenak. Berriro ere erabiltzen da ABEEEa “tresna” bezala malgutasun handiagoa izateko bide moduan.

Salatu dugu Ausolanek kanpoko enpresa bat kontratatu duela baja medikoak kontrolatzeko

Ausolan enpresako kolektibitateetarako sukaldaritzako eta garbiketako langileek elkarretaratzea egin dute gaur Espartzan (Nafarroa), enpresaren egoitzaren aitzinean, salatzeko posta elektroniko bidez izan dutela kanpoko enpresa bat kontratatzeko alde bakarreko erabakiaren berri. Kanpoko enpresa horrek langileen baja medikoak kontrolatuko ditu. Erabaki hori ez da sindikatuetako ordezkariekin partekatu ez negoziatu. Langileek aldarrikatu dute diru hori prebentziorako erabiltzea, eta ez kontrolerako.