2024-02-28
HomeUncategorizedJaurlaritzak Euskal Enplegu Publikoaren Legea deitutakoaren aurreproiektuaren aurkezpen bileraren LABen balorazioa

Jaurlaritzak Euskal Enplegu Publikoaren Legea deitutakoaren aurreproiektuaren aurkezpen bileraren LABen balorazioa

Euskal Enplegu Publikoaren Legea aurrera ateratzeko tramite hutsa gaur Lakuan

Gaur Lakuan Euskal Enplegu Publikoaren Legea deitutakoaren aurreproiektua aurkezteko bilera eduki dugu EAEko Mahai Orokorreko ordezkariok Eusko Jaurlaritzako ordezkaritzarekin. Administrazioak azaldu duenez, hau da hirugarren legegintzaldia testua aurrera ateratzen saiatzen ari direla -Ibarretxe, Lopez eta Urkullurenak- eta ia aldaketarik eduki ez duen zirriborroa azkenean Gasteizko parlamentuak onartu beharko du.

Oso argi gelditu da Eusko Jaurlaritzak eta LABek “negoziazio” kontzeptua erabat ezberdin ulertzen dugula. Izan ere gure ustez negoziazio baten helburua beti akordio bat izan behar baita, eta Administrazioak ez du akordioren beharrik, baldin eta inposatzeko aukera badauka. Halaxe onartu du sailburuordeak hainbatetan, “ekarpenak egiteko” aukera eskaini baitu, ondoren eurek nahi dituztenak jasotzeko.

LABek garrantzi handiko lege hau bermeekin negoziatzen hasi baino lehen bi gai argitzeko eskatu du, aste honetan banatu dugun oharrean genion bezala: Ea benetan BERTAKO lege bat den egin nahi dena ala espainiar estatuak inposatutako EBEP delako legearen garapen hutsa izango den; eta legeak benetako negoziazioak gauzatzeko ateak irekitzeko aukera irekiko duen ala inposizioan oinarritzen jarraituko den.

Horrela ba eta espero bezala, erantzunak eta jokabidea bera ere erabat ezkorrak izan dira: egungo legedia ukatzea ez dela errealista batetik, eta akordioan oinarritutako negoziazioa ukatzen jarraitzen dute bestetik. LABek testu osoa atzera botatzea eskatu eta osoko zuzenketa egingo du.

Administrazioarentzat sindikatuok -administrazioak beraiek eta zerbitzu publikoak aurrera eramateko ezinbestekoak garen langileon ordezkariak- “ekarpenak egiteko” soilik gaude, bai legearen zirriborroan zein legea bera aurrera ateratzeko prozeduran ere. LABentzat hori ez da negoziazioa. Hurrengo asteetan irakurketa zehatzagoa kaleratuko dugu, eta zerbitzu publikoetako LABeko ordezkariekin gogoeta ariketa ere egingo dugu.

LABek Eusko Jaurlaritzari eta Gasteizko Parlamentuko alderdiei zera exijitzen die: benetan bertako legea bermeekin negoziatu ahal izateko behar diren tresnak jartzeko, inposiziorik gabe, kanpoko injerentziarik gabe eta langileon parte-hartze errealarekin.
 

 

 

AZKEN ALBISTEAK | ÚLTIMAS NOTICIAS

Eraso judizialen aurrean, euskaraz lan egin eta bizitzeko eskubidearen aldeko mobilizazioetan parte hartzera dei egiten dugu

Botere judizialak euskararen aurka egiten dituen erasoek ez dute etenik. Azken egunotan, Bizkaiko Foru Aldundiaren enplegu publikorako hautaketa-prozeduren aurkako bi epairen berri izan dugu. Deialdi horiei lotutako hizkuntza-eskakizunen betekizuna da zalantzan jartzen dena. Diskriminatzailetzat jotzen da euskara eskatzea, enplegu publikoak baldintza berdinetan eskuratzeko oinarrizko eskubidea urratzen duela argudiatuta. Sententzia zentzugabekeria juridiko izugarria da, inolako oinarri juridikorik gabe euskararen normalizazioaren aurka egitea du helburu bakarra.

Amazonen ereduak dakarrena salatu dugu BECen, greba egunen bezperan

Paketatze, banaketa eta garraio ereduak dituzte hizpide gaur eta bihar bitartean BECen, Barakaldon. Robotizazio, digitalizazio eta automatizazioak sortzen duen lan-eredua definitzen ari dira eta badugu eredu horretan adierazlea den ezaguna: Amazon multinazionala. Lan eredu berriak indarrez inposatu eta edozein hobekuntza negoziatzera uko egiten dion enpresa.

Osakidetzako zuzendaritzak ez du bermatzen EAGak irekita izatea oinarrizko plantillarekin

Atzo sindikatuetako ordezkariak, langileak eta herritarrak bildu ginen, EAGetan bizi dugun egoera salatzeko.