Hego Euskal Herriko sindikatuok mobilizazioak egin ditugu gaur Bilbo, Gasteiz, Donostia, Iruñea eta Tuteran. Igor Arroyo koordinatzaile orokorra Bilbokoan egon da eta adierazi du “nabarmena” dela “Euskal Herriko sindikatu guztiak elkartu garela gaurko mobilizazioetan”.
“Euskal Herriko langileon ikuspegia garbi geratzen da: gu Palestinako herriarekin gaude eta genozidioaren kontra”, gaineratu du Arroyok eta Euskal Herriko erakunde publiko eta patronalak interpelatu ditu jarraian. “Zein da zuen posizioa? Nolako jarrera hartuko duzue genozidio honen eta bereziki, berau bultzatzen ari den sionismoaren aurrean? Hemengo erakunde publikoei eta patronalari exijitzen diegu genozidekin harremanak apurtzeko, genozidak presionatzeko eta haiekin negoziorik ez egiteko, momentu latz hauetan”.
Mobilizazioetan, minutu bateko isilunea egin dute mobilizazioetan Mahasen Al-Khatib ilustratzaile palestinarraren hilketa salatzeko.
Hego Euskal Herriko ikastetxeetan ere hainbat kontzentrazio egin dituzte.
Arratsaldean, Gernika-Palestina ekimenak mobilizazioak deitu ditu 19:00etan udaletxeen aurrean eta horietan ere parte hartzeko deia egin dugu.