LAB, ELA, CCOO eta UGT sindikatuok, Euskal Aktoreen Batasuna sindikatuarekin batera, Euskal Autonomia Erkidegoko Interpretazio Eszenikoaren sektorerako lehen hitzarmena sinatu dugu. Hitzarmen berri hau sinatuta, orain arte araututa ez zegoen sektorea erregularizatzea lortu da.
Hauek dira hitzarmen kolektiboaren eduki nagusiak:
- Indarraldia: 2023/04/26tik 2025/06/30era. Indarraldia amaitutakoan, hitzarmenak indarrean jarraituko du ordezkatzen duen beste batek berritzen duen arte.
- Soldata-igoerak: hitzarmena indarrean dagoen urte bakoitzerako KPIa.
- Ez aplikatzeko klausula: Enpresaren batek hitzarmena aplikatu nahi ez badu, langileen baimenarekin bakarrik egin ahal izango du.
LABentzat oso garrantzitsua da hitzarmen hau sinatzea, izan ere, orain arte, sektoreko langileek zituzten erreferentzia bakarrak estatu mailako akordioak ziren, eta hitzarmen berri honekin, sektorean lan egiten duten pertsonek dituzten aldarrikapenak negoziatzeko esparru bat sortzeaz gain, egonkortasun ekonomikoa sortzen du bizitzaren garestitzea inoiz baino handiagoa denean, langileen erosteko ahalmena bermatzen baitu hitzarmenaren indarraldi osoan.
LAB sindikatuan, Euskal Herriko ondasun ezinbesteko eta babestu beharrekotzat ulertzen dugu kultura. Kultura bere espresio zabalenean ulertuta, kultura egin eta kontsumitzeko eredu guztiz berri bat bultzatzen dugu, kultur sortzaile eta kontsumitzaile eskubideak babestuz.
Bide horretan, LABen Programa Sozioekonomikoan, sortzaileak langile eskubide ororen jabe izatearen alde kokatu gara, sortze prozesu osoa barnebilduz, gutxieneko soldata bermatuarekin. Aldi berean, espazio publikoen doaneko erabilpena bultzatzen dugu kultura sortu eta kontsumitzea oinarrizko eskubidea izan dadin.
Trantsizio horretan ordea, gaurko hitzarmen hau berri oso on bat da, aktoreen lan baldintzak Euskal Herriko egoerara egokitu eta arautzea lortu dugulako.
Bukatzeko, eskerrak eman nahi dizkiogu Euskal Aktoreen Batasunari, izan ere, egin duten ahaleginik, temarik eta lanik gabe ezinezkoa izango zen hitzarmen berri eta on hau lortzea.