Pasa den astean Bilbon egin genuen bezala, kontzentrazioa egin dugu gaur Eusko Jaurlaritzaren Hezkuntza Sailaren Donostiako ordezkaritzan, eskola jangeletako hitzarmen duina eskatzeko. Gainera, ikasturte hasierarekin bat, EAEko eskola-jangeletako langileen asanbladak deitzen hasi da LAB, hitzarmen kolektiboaren egoera konpartitzeko.

Hitzarmen honetan patronala kezkatuago dago laneko absentismoagatik langileen lan-kargengatik baino. Azpikontratetako langileek Hezkuntzako murrizketak jasan behar dituzte soldata berdinagatik funtzio gehiago hartuz euren gain, euren lanaren aitortzarik jaso gabe gainera.

Langileen aldarrikapenak argiak dira: Hezkuntzako langile laboralekin soldata parekatzea, ratioak hobetzea, zentroaren antzinakotasuna ezartzea, funtzioak berraztertzea, urteko lanaldia euren egutegietara egokitzea, aldizkako langile finkoen kontratazioa, langile guztiak euskalduntzea.