LAB, UGT, CCOO eta ELA sindikatuon oharra, Gasteizen gaur egindako mobilizazioaren harira:
Ardogintzaren inguruan honako alderdietan oinarritutako irudi idilikoa zabaldu da: kokapen pribilegiatua (Araba Errioxa), bere paisaia (UNESCOk Gizateriaren Ondarea izendatua), bere ardoen aitorpena hemen zein nazioartean, proiektu handinahi eta garestiak mundu mailako sona duten arkitektoen eskutik (Frank Gehry, Santiago Calatrava….).
Aberastasun eta handinahi hau sektoreko langileek bizi duten errealitatearekin kontraesanean dago.
2018ko abendutik lanean ari ginen Arabako Ardogintzaren Lan Hitzarmen Mahai Negoziatzailean hiru urterako Lan Hitzarmena izateko, 2019, 2020 eta 2021rako, hain zuzen ere. Aurtengo martxoan, modu logikoan, eten egin zen negoziazioa eta uztailean berreskuratu genuen. Gure aldetik, zegokigun moduan, proposamen berria egin genuen: ordura arte adostuta genituen gai sozialekin negoziazioak ixtea, 2019an %2ko igoerako lansaria eta 2020rako eta 2021rako igoerak mahats-bilketaren ostean adostea.
SEAren erantzuna hauxe izan zen: ezin zuela akordio hori onartu sektorea ustez jasaten ari zen ziurgabetasunaren ondorioz eta dei egiten zigun negoziaketekin irailetik aurrera jarraitzera.
Langileak egunero lan zentroetan ikusten ari garena da ez dagoela lan gutxiago, gehiago baizik (batez ere upategi handietan) eta hori dela, gero eta presio handiagoa jasan behar dute langileek.
Horregatik, gaur eta hemen, bilkura honekin, hitzarmen duina eskatzen dugu Arabako Ardogintza sektorerako.
Astelehenean, urriaren 26an, SEAk Mahai Negoziatzailerako deitu gintuen datorren asterako, ez dakigu zein asmorekin.
Bilera horretan erabakitzen den arabera, mobilizazioak areagotuz joango dira.