Arabako Metalgintzako hitzarmenaren mahai negoziatzailearen beste bilera batera deitu dute ostiralerako Gasteizen, Lan Harremanetarako Kontseiluaren egoitzan. Bileraren harira, sindikatuok elkarretaratzea egin dugu kanpoaldean, hitzarmen duin baten defentsan.

Arabako Metalgintzako ordezkaritza sindikalaren gehiengo zabala osatzen dugun sindikatuok, oso kultura sindikal desberdinetatik etorri arren, dinamika bateratu bati ekin diogu sektoreko langileentzat lan baldintza duinak erdiesteko. Antolatutako mobilizazioen artean, manifestazio jendetsu bat egin genuen Gasteizen, joan den otsailaren 19an.

Grebarako unea

LABek oso argi du antolakuntza, mobilizazioa eta borroka beste biderik ez dagoela hitzarmen duin bat lortzeko, eta grebarako unea dela berretsi dugu Arabako Metalgintzan. Ondoren, gure irakurketa, gaurko bileraren harira:

Gaur, martxoak 4, berriro bildu da Arabako Metalaren Negoziazio Mahaia. Bilera baino lehen, hamarnaka langilek elkarretaratzea egin dute lan baldintza duinak exijitzeko. Bileran bertan, SEAk bere burua behartuta ikusi du, mobilizazioen ondorioz, aldaketa txiki batzuk egiteko baina sektoreko arazo nagusiei erantzun gabe jarraitzen du. Hori dela eta, LABek uste du momentua dela grebak egiteko.

Arabako Metaleko Negoziazio Mahaia 10:00etarako deituta bazegoen ere, 9:30etan sektoreko hamarnaka langilek elkarretaratzea burutu dute CRL-LHK aurrean, ELA, CCOO, LAB, USO, ESK eta CGT sindikatuek deituta. Elkarretaratzean Arabako Metalean lan baldintza duinak exijitu dituzte, sektorean borroka aldarrikatzeaz gain.

Aurreko asteetan mobilizazio ugari ere egon dira sektorean; hortaz gogorarazi behar dugu pasa den otsailaren 19an ia 1500 pertsonek parte hartu zutela 6 sindikatuok eta hamarnaka komitek deitutako manifestaldian. Bada, LABen ustez, mobilizazio horien ondorioz, eta baita horrek daukan potentzialitatearengatik ere, SEAk bere burua behartuta ikusi du mugimenduak egitera. Mugimenduok, ordea, oso txikiak izan dira eta ez diete erantzun sektoreak dituen arazo nagusiei.

Izan ere, patronalak oraindik ez du inolako aurrerapenik egin gai nagusietan: KPItik gaineko soldatetan, lanaldi jaitsieran, subrogazioan, aldibatekotasuna eta kontratazioan dagoen iruzurrean, lan osasunean, malgutasunean, baimenetan, Formazio Dualean,… Beraz, beraien negoziatzeko borondatea ziurtatu gabe dago.

Hori guztia kontuan hartuta, LABek uste du momentua dela Arabako Metalean grebak egiteko, eta horrela luzatu diegu dinamika amankomunean dauden gainontzeko sindikatuei. Momentu egokiena da 6 sindikatuok mobilizazioak indartzeko eta langileak grebara deitzea, beti ere lan baldintza duinak lortzea helburu.