Gizarte ekimeneko ikastetxeetan dagoen lan gatazka konpontzeko asmoz eta blokeo egoera batean aurkitzen direla salatzeko, LABek Kristau Eskolari dagoen blokeo egoera gainditu ahal izateko EAEko lan hitzarmena indarrean jar dezan exijitu eta Estatuko lan hitzarmena bazter dezala eskatuko dio behin eta berriz. Gaur Lakuan izan dira Jaurlaritzari interpelatzen Hezkuntzarako finantziazio sistema berria exijitzeko.

Azken urteetan Eusko Jaurlaritza egundoko murrizketak ezartzen ari da zerbitzu publikoetan, gobernua patronal neoliberalen antzera jokatzen ari da: negoziazio kolektiborako eskubidea “de facto” desagerrarazi dute eta enplegu publikoa suntsitzen ari da eta honen ondorioz zerbitzuaren kalitatearen galera sortuz.

Hezkuntzari dagokionez, Eusko Jaurlaritzari gatazka honetan duen erantzukizunari aurre egin diezaiola eskatzen diogu, hezkuntzarako finantziazio sistema berri bat ezarriz. Egungo egoera ez da aldatuko, Eusko Jaurlaritzak ez badu bere gain hartzen Hezkuntza Lege berri baten sorrera hartzen.

Aipatutako Hezkuntza Legeak langileen lan-baldintzak hobetu, kontratazio sistema bateratuak, hauen garapen profesionala eta soldaten homologazioa eta ikastetxeei finantziazio-maila egokia bermatzea ahalbideratu behar ditu besteak beste. Ondorioz, Eusko Jaurlaritza interpelatzen dugu aipatu Legea jorratu dezan.

Hori dela eta gaur, martxoak 20, goizeko 10:30etan LABek elkarretaratza egin du Eusko Jaurlaritzak Lakuan (Gasteizen) duen egoitzaren aurrean Hezkuntzarako finantziazio sistema berria exijitzeko.