Nafarroako Justizia Auzitegi Nagusiak aintzat hartu du LAB sindikatuko zerbitzu juridikoek jarritako helegitea eta Barañaingo enpresa batek berriz hartu beharko du minbizia izateagatik kaleratu zuen langile bat; gainera, azken 27 hilabeeetan sorturiko soldaten kontura 30.000 euro inguru ordaindu beharko ditu enpresak. Auzitegiak onartu du langilea bere gaixotasunagatik kaleratu zutela eta, beraz, kaleratzea deusez izan zela. LAB pozik agertu da epaileek zuzendu dutelako enpresak eginiko bidegabekeria.

Bularreko minbizia baitzuen, Barañaingo (Nafarroa) supermerkatu baten barnean dagoen Soginlandsec izeneko garbitegian lan egiten zuen emakume bati laneko baja eman zioten duela 27 hilabete. Langileak baja hartu eta berehala, enpresa gupidagabeak langilea kaleratu zuen, arrazoi ekonomikoak argudiatuta. Langileak LABera jo zuen eta sindikatuaren zerbitzu juridikoek kaleratzea baliogabetzeko eskatu zuten.

Auzia landu duten sindikatuko abokatu Oihan Castro eta Iñaki Chaconek esplikatu dutenez, lehen instantzian laugarren epaitegian eginiko epaiketan, LABek frogatu zuen ―eta enpresak epaiketaren egunean berean onartu zuen― kaleratzearen gibelean ez zegoela arrazoi ekonomikorik (enpresak irabaziak baitzituen); sindikatuaren iritziz, kaleratzeak diskriminazio asmoa zuen. Lehen instantziako epaileak, baina, ez zuen LABen argudioa onartu eta eskaera desestimatu zuen.

LABek helegitea jarri zion lehen epai bidegabe hari eta, oraingoan bai, Nafarroako Justizia Auzitegi Nagusiak arrazoia eman dio. Enpresak gaixotasuna dela-eta kaleratu zuen langilea eta, horregatik, kaleratzea deusez da: langilea berriz hartu beharko du eta kaleratu zuenetik sorturiko 27 soldaten zenbatekoa ordaindu beharko du. 30.000 euro inguru izanen dira enpresak ordaindu beharrekoa. Bistan denez, langileak oso soldata txikia zuen.

Langileak urte eta erdi eman du bajan, orain 51 urte ditu eta, zorionez, minbizia gainditua du.