2025-02-13
HomeEkintza SindikalaGuardiako alkateak herria erabili nahi du bere interes pertsonalen alde egitekoeta bere...

Guardiako alkateak herria erabili nahi du bere interes pertsonalen alde egitekoeta bere jardunbide txarrak ezkutatzeko, langile baten lintxamendua sustatuz

Guardiako alkate Raul García Ezquerrok (EAJ) harritu egin gaitu sare sozialetan eta prentsan Udalaren zigilua daraman “Informazio Ohar” batekin. Ohar hori ez dago sinatuta, eta informazio oker eta interesatuz beteta dago.

Alkateak, ohar horretan, dei egiten dio Guardiako herriari osoko bilkura batean parte har dezan. Bertan, Udaleko langile bati bere ordainsariei dagokienez arrazoia eman zion epai baten aurkako errekurtsoa jarri izana berretsi nahi du.

Langileari arrazoia ematen dion epaiak, LAB sindikatuan aspalditik salatzen ari garen gai bat azpimarratzen du: lanpostuen balorazioak eguneratu ez izana. Hori sistematikoki urratzen da udal askotan, Guardian, besteak beste, eta zuzenean eragiten du langileen ordainsarien eskubideetan.

Hori gutxi balitz, alkateak alde bakarretik jarri zion errekurtsoa epai horri, atzeko atetik, bere aholkulari pertsonalek abalatutako ihesbideekin, eta udalbatzara eraman gabe, legez derrigorrezkoa izan arren. Gainera, alde batera utzi ditu alde sindikaletik eta politikotik arazoa konpontzeko garaian eta moduan egin zitzaizkion errekerimenduak.

Oposizioko zinegotziak ere mehatxatu zituen, esanez beren ondare pertsonalarekin erantzungo zutela udalak errekurtsoa galtzen bazuen eta kostuak ezartzen bazitzaizkion.

Eta, azkenik, gertakaria salatu zuen langilea modu sistematikoan zokoratu eta deseroso sentiarazi dio.

Orain, alkateak Guardiako herria langilearen aurka erabili nahi du, gezurrak eta datu interesatuak zabalduz. Gezurrak, eta gezur gehiago, bere arduragabekeria nabarmena estaltzeko langile batenganako lintxamendu herrikoia bultzatuz, langile horrek egin duen gauza bakarra bere lan eskubideak defendatzea izan denean. 

LABek ez ditu onartuko ordezkari politiko baten horrelako jarrera arduragabeak, mafiosoak eta ez duinak. Eskura ditugun baliabide guztiekin jardungo dugu, egia argitara atera dadin eta norberari dagozkion erantzukizunak argitu daitezen.

AZKEN ALBISTEAK | ÚLTIMAS NOTICIAS

2025eko lehen garraiolaria hil da Pasaian

Gaur jakin dugu, joan zen astean Pasaiako Portuan kargatzen ari zen bitartean istripu ez traumatikoa jasan zuen A.D.O., Andoaingo 48 urteko garraiolaria, hil egin dela.

DBIZIko langileek bigarren egunez 2 ordutako lanuzteak egin dituzte bizi duten egoera prekarioa salatzeko

Enpresarekin bi aldiz bildu eta gero, ez dute gatazka konpontzeko borondate handirik ikusten eta Aldi Baterako Enpresa Elkartea osatzen duten enpresek ardura nagusia Udalarena dela diote, eta honek ezer egin ezean ezinezkoa izango da konponbide bat ematea.

7 lanuzte 7 egunetan Nafarroako irakaskuntza publikoan

Hezkuntza Departamentuaren jarrera itxiaren aurrean, gehiengo sindikalak mobilizazioak iragartzen ditu hurrengo asteetarako.