Jaso Itsasondo enpresako langileek mobilizazioei ekingo diete ostegunean, enpresa-itun duin baten alde. Hain zuzen ere, enpresa batzordeak jakinarazitakoaren arabera, greba mugagabe partziala egingo dute abenduaren 1etik aurrera. Batzarrean, langileen %70ek eman diote babesa erabakiari.
Urtebete pasa da jada negoziaketak hasi zituztenetik, eta soldataren igoeraren gainetik eskubide sozialak lehenetsi dituzte Jaso Itsasondoko langileek. Enpresa batzordeak alternatiba ezberdinak proposatu dizkio zuzendaritzari akordio batera iristeko helburuarekin, baina zuzendaritza ez da bere posiziotik mugitu.
Joan den martxoan bost eguneko greba egin zuten, eta, orduz geroztik saiakera ezberdinak egin dituzten arren, ez dira akordio batera heldu. Hala, greba mugagabe partzialera deitu dute datorren ostegunerako.