Joan den otsailaren 15ean, EDE taldeak ST3 elkartearekin lehenbailehen eta ahalik eta erarik traumatiko eta definitiboan amaitzeko asmoen aurrean, ST3ko langileek eurek asanblada bat egin zuten. Greba mugagabea egitea erabaki zuten bertan, gaurtik abiatuta. Hala, elkarretaratze bat egin dute elkartearen egoitzaren aurrean, bizi duten egoera jasanezina salatzeko: zenbait hilabete daramatzate kobratu gabe eta lanean jarraitu dute euren lanpostuekin zer gertatuko zen jakin gabe. EDE Taldeko arduradunek ST3 likidatzea eta bertako langileen kontratuak amaitzea eskatu dutela joan den otsailaren 12an jakin zuten langileek.
Gertaerek hartu duten abiadurarekin, informazio faltaren eta EDE taldeko arduradunek ST3 itxi eta kontratatutako langileak etxera bidaltzeko duten asmoen aurrean, ST3ko langileek ikusi dute greba dela geratzen zaien aukera bakarra. Honekin ikusarazi nahi dutena da euren lanak zein garrantzitsuak diren EDE taldea osatzen duten beste entitateetako langileentzat.
LAB, ESK, CNT eta ELAko atal sindikaletatik gure babes osoa ematen diegu ST3ko langileei, bat egiten dugu greba deialdiarekin eta langileekin egongo gara antolatzen dituzten mobilizazio guztietan.