2017ko otsailaren 9an, Eusko Legebiltzarreko osoko bilkuran eta gehiengo osoz, gizarte zerbitzuak arautuko dituen ratio dekretu berri bat egiteko erdibideko zuzenketa bat onartu zen.
Dekretu honen prestatze lanetan, hiru maila instituzionaletako parte hartze teknikoa, sektoreko entitate sozialen, erabiltzaileen eta langileen ordezkarien parte hartzea ere onartu zen. Eta hiru hilabeteko epean dekretu horien zirriborroak Legebiltzarrean aurkeztea ere jasotzen zen.
Ia bi hilabeteren ondoren LABen ez dugu lantalde horren berririk izan ezta dekretuen zirriborroarena ere ez. Horregatik Enplegu, Gizarte Politika eta Gazteria Batzordean agerraldia eskatu eta egin dugu.
Honetan, gaur egungo egoeraren diagnostiko azkar bat egin ondoren, hainbat galdera egin dizkiegu parlamentariei. Lehenik, lan taldea martxan noiz jarriko duten galdetu diegu. Bigarrenik, parte hartzearen inguruan eta azkenik, zirriborro hori egiteko gizarte zerbitzuen egoeraren inguruan diagnostikoren bat egin duten ere galdetu diegu.
Honen erantzun argirik jaso ez dugunez, LABek argi du ez duela inposatutako dekreturik onartuko eta honen zirriborroa egiteko lan taldea lehenbailehen deitzeko eskatzen dugu.
Horregatik, LABek borrokatzen jarraituko du, Eusko Legebiltzarreko alderdi guztiekin bilera eskatuko du eta Eusko Jaurlaritza interpelatzen jarraituko du gizarte zerbitzuetako profesionalen kopurua handitu eta zerbitzuaren kalitatea hobetuko duen ratio dekretu berri bat egin arte.