Gaur uztailak 19, Nikaraguako Iraultza Herritar Sandinistaren garaipenaren 40. urteurrena da. Gaurko egunarekin orain 40 urte, FSLNeko gerrilari zutabeak Managua hiriburuan sartu ziren herritarren babes zabalarekin, Anastasio Somozaren porrotarekin.
iraultza Sandinistaren garaipenaren ondoren sorturiko gobernu berriak Nikaraguako estatu berrian erreforma nabariak egin zituen eremu sozio-ekonomiko eta politikoan. Hortaz gain osasungintzan, hezkuntzan eta lurraren banaketan herrialdeak zituen arazoei aurre egiten hasi zen. Erreforma guzti hauek hobekuntza nabariak ekarri zituzten Nikaraguako herriarentzat, besteak beste nazioarteko aitortza ere izan zutelarik.
Estatu Batuak ordea, ez ziren geldirik geratu eta “kontra” deituriko oposizioa armaz hornitu eta antolatu zuten. Honen ondorioz, Nikaraguako herria guda zibil batera eraman zuten, eta eremu guztietan izugarrizko presioa suposatu zuen gobernu sandinistarentzat. Krisitik ateratzeko 1990an deituriko hauteskundeetan FSLN-ak galdu egin zuen UNO-ren aurrean. Kolazio hau FSLN-ren kontra antolaturiko oposizioaren batasun bat zen, Estatu Batuen babes osoa zuena eta Violeta Chamorroren lidertzapean zegoena. 2006ko azaroaren 5ean FSLN-ek hauteskundeak irabazi zituen bozen %38arekin, 16 urtetako gobernu neoliberal eta atzerakoiekin bukatuz, Iraultza Sandinistaren hobekuntza guztiak desagertaraziak zituztenak.
Gaur egun Nikaraguak ezegonkortasun politikoa bizi du, gobernu sandinistaren kontra 2018ko apirilean eztanda egin zuen biolentziak eraginda. Protestak gobernuak gizarte segurantzan egin nahi zituen erreforma batzuen kontra hasi ziren, osasun zerbitzu unibertsal eta doakoa bermatzea zutenak helburu, baino protesta horiek, segituan, gobernu sandinista boteretik kentzeko estrategia bilakatu ziren.
LABetik, Iraultza Sandinistaren 40. urteurrena eta iraultza honek Nikaraguako herriarentzat osasungintzan, hezkuntzan, eta pobreziaren nahiz desnutrizioaren kontrako borrokan suposatu dituen hobekuntza sozialak gogoratu ekarri nahi ditugu, Nikaragua Amerikako kontinenteko herrialde txiroenetako bat dela azpimarratuz.
Venezuelan defendatzen dugun berdina defendatzen dugu Nikaraguan ere. Inguru horren bakea, egonkortasuna, lankidetza eta integrazioa, eta Nikaraguak pairatzen duen kanpo injerentzia eta jazarpenaren ondorioz mehatxupean egoteak arduratu egiten gaitu. Aktore batzuk gerra eta interbentzioaren alde egiten duten bitartean, beste batzuk, ahalegin handiarekin, gatazkak konpontzeko elkarrizketaren eta negoziazioaren bidea indartzen saiatzen ari dira. Gutariko bakoitzaren gune eta eginkizunetatik, bertan eta munduan elkarrizketa eta negoziazio politikoa helburu dituzten ekimenak laguntzen eta babesten ditugu.