2024-03-05
HomeOharrakZerbitzu PublikoakGASTEIZKO GOBERNUAK ZERBITZU PUBLIKOETAKO MAIATZAREN 31ko GREBA-LANUZTEA INDARGABETU NAHI DU

GASTEIZKO GOBERNUAK ZERBITZU PUBLIKOETAKO MAIATZAREN 31ko GREBA-LANUZTEA INDARGABETU NAHI DU

Pasa den astean, ELA eta STEE-EILASek maiatzaren 31ko greba deialdia deskonbokatzen zutela publiko egin eta gero, LABek aipatutako deialdiarekin — nahiz eta, begi bistako arrazoiengatik, bi orduko lanuzte izaerarekin birformulatu— aurrera egiteko asmoa berretsi egin genuen. 
Handik gutxira Gasteizko Gobernuaren bozeramaleak —gure hitzak manipulatuz, sindikatu honek ez baitzuen ezein momentutan bere Gobernuaren ekintzak positibotzat hartzen genituenik esan, ezta greba deskonbokatzen genuenik ere,
guztiz kontrakoa baizik— poza azaldu zuen publikoki, “gure herria greba gehiago egiteko ez dagoela” iritzita.

Bada, 24 ordu ere igaro gabe, berak ordezkatzen duen Gobernuaren jakinarazpen bat jaso genuen non lanuztearekin aurrera egiteko baimena ukatu egiten ziguten. Ostean Gobernuaren deia ere jaso dugu, lanuzteak deskonbokatu ditzagun “gonbidatea” eginez.

Ahoz eta jendaurrean ustezko deskonbokatoriagatik poza azaltzen dute, eta praktikan deialdia oztopatzeko ekimena abiatzen dute. Hau erabaki politikoa da, ustezko arrazoi formalak argudiatzen dituzte erabaki politikoari jantzi juridikoa emateko asmoz, baina esan bezala, erabaki politikoa da. LABek, testuinguru sindikal konplexu honetan ere, deialdiarekin aurrera egitea erabakitzea eta deialdia kolektiboarekin grebarako arrazoiak zein diren konpartitzeko probestea ez dute ondo hartu, eta horregatik erreakzionatu dute horrela.

Deialdiak beharrezkoak diren betekizun formal administratibo guztiak betetzen ditu legezkoa izateko.

Hartu dugun erabakia zuzena da, eta Gasteizako Gobernuaren erreakzioak hori berrestera garamatza. Erabaki zuzena da, Gobernuak azaldutako urduritasunak are argiago uzten du hala dela. Garbi entzun dezatela, LABek ez du beste barik zerbitzu publiko eta babes sozial sistema suntsitzen utziko, ez gara begira geratuko; zerbitzu publikoak garatu ditzaten eta enplegu publikoa mantendu dezaten bakarrik ez, enplegu publiko gehiago sortu dezaten eta lan baldintzak hobetu ditzaten ere borrokan segiko dugu, horretarako erabateko konbentzimendu eta konpromisoa dugu.

Patxi Lopez zerbitzu publikoen bermatzaile gisa aurkezten digun kanpaina horixe besterik ez da, kanpaina hutsa. Hitzek gauza bat adierazten dute baina ekintzek guztiz kontrakoa. Beren benetako aurpegia behin eta berriz erakusten dute, antolatua duten zirko mediatikoaren atzean murrizketak eta eskubideei erasoak besterik ez daude:

– Zerbitzu publiko eta eskubide sozialen murrizketan aitzindari dira eta izan dira, zentzu honetan Idoia Mendiaren hitzei aipamen eta argipen txiki bat egin nahi diegu: herri hau (Euskal Herriaz ari gara) ez dago enplegu eta zerbitzu publikoen suntsiketa jasaten jarraitzeko prest, ez zerbitzu publikoen suntsiketa jasaten segitzeko, ezta bere Gobernuak esandako moduko gezurrak entzuteko ere.
– Orain gainera oinarrizko eskubideak murrizten eta erasotzen ere aitzindari izan nahi omen dute: Madrilgo PPko Gobernuak greba eskubidea kolokan jarri nahi duen honetan, hara non Gasteizen PSE ateratzen den greba eskubidea trenkatu nahian.

Ez dugu borrokatzeko gure eskubidea kentzerik onartuko, ez dugu mehatxurik onartuko. Beraz, maiatzaren 31n kalera ateratzeko hamaika arrazoi bagenuen, orain badugu gehitu beharreko beste bat: greba eskubidea defendatzea.

Gasteizen, 2012ko maiatzaren 28an

AZKEN ALBISTEAK | ĂšLTIMAS NOTICIAS

LABek Munduko Federazio Sindikalak Sao Paulon egindako Kontseilu Presidentzialean parte hartu du

Pasa den asteburuan Munduko Federazio Sindikalaren Kontseilu Presidentziala egin zen San Paolon, Brasilen. Munduko Federazio Sindikala 1945 urtean sortutako elkartea da. 133 herrialdetako 105 milioi langile inguru ordezkatzen ditu. Kontseilu Presidentziala bere zuzendaritza gune nagusia da, kontinente desberdinetako 50 kidek osatutakoa.

Lan eta bizi baldintzak ez dira hobetzen eta prekaritateak egiturazkoa izaten jarraitzen du

Araba, Nafarroa, Gipuzkoa eta Bizkaian 141.582 langabe daude; beraz, pasa den urtetik %2,13a jaitsi da langabezia Hego Euskal Herrian. Enplegua, ordea, sektore prekarioetan sortzen ari da, lan baldintza prekarioekin eta egoera zaurgarrian dauden herritarren bizitzetan inpaktu zuzenagoa eraginez. Hego Euskal Herrian, 25 eta 64 urte arteko bi herritarretik bat prekaritate egoeran bizi da, enplegua izan arren, bizitza duina bermatzeko diru-sarrera nahikorik gabe.

San Juan de Dios ospitaleko langileek elkarretaratzea egin dute Iruñean, hitzarmenaren negoziazioa blokeatuta dagoela salatzeko

San Juan De Dios Ospitaleko enpresa batzordeak elkarretaratzea egin du Iruñean, Osasunbidearen egoitzaren parean, Oliveto kondearen kalean. 2023-2024 hitzarmen kolektiboaren negoziazioaren egoeraren berri eman dute. 2023ko abenduan, Grupo Independiente eta LABek osatutako enpresa-batzordeak, negoziazio-plataforma aurkeztu zuen, eta abenduaren 15ean mahaia eratu zen, urtarriletik aurrera negoziazioari ekiteko.