LABeko idazkari nagusi Garbiñe Aranburuk eta Ekintza Sindikaleko eta Negoziazio Kolektiboko idazkari Xabier Ugartemendiak agerraldia egin dute Bilbon, Covid-19aren pandemiaren bigarren olatu honetan bizi dugu egoera soziokonomikoaren inguruan egiten dugun irakurketaren berri emateko. Kurtso politikoaren hasieraren harira egindako prentsaurrekoan, akordioak beharrezkoak direla nabarmendu dugu, baina inolaz ere egungo sistema elikatzen jarraitzeko; enpleguaren suntsiketa gelditzeko, lan baldintzak duintzeko, zerbitzu publikoak indartzeko, zaintza lanak aitortzeko eta aberastasuna modu bidezkoago batean banatzeko baizik.
“Herritarren interesak eta beharrak erdigunean jartzeko akordioak behar ditugu, eta honek elite ekonomikoaren interesekin talka egiten du. Horregatik, patronala-erakundeak bikoteak ez dio gai honi heltzen”.
Garbiñe Aranbururen hitzak dira hauek, Bilbon egindako agerraldian esandakoak. Herri honetan arduraz jokatzen ari direnak herritarrak direla esan du; horregatik, ardura politikoak saihesteko erakundeetatik norbanakoei zuzendutako ardura dei etengabea salatu du, ondoko gabeziak daudenean:
-Ez dago inolako planik enplegua salbatzeko. Lan erreformak bertan behera utzi behar dira, eta formula berriak bilatu enplegu suntsiketa saihesteko eta berria sortzeko; zaintza, osasungintza eta irakaskuntza arloetan, kasu. Era berean, egungo enplegua duindu behar da. Pandemia honek erakutsi digu zeintzuk diren oinarrizko sektoreak, zer den garrantzitsua bizitza sostengatzeko. Sektore horietako asko eta asko feminizatuak eta prekarizatuak daude.
-Ez dira hilabete hauek baliatu osasungintza publikoa indartzeko, ez da kontratazio berririk egon. Oso larria da Lehen Arretan ematen ari den egoera. Aurreikuspen eta planifikaziorik eza egon da.
-Hezkuntzari dagokionez, urteak eman ditugu ratioak jaitsi behar direla esaten eta murrizketak salatzen. Ez dago Hezkuntzan inbertitzeko apusturik. Ikasturte hau planifikatzeko unean, berandu eta gaizki ibili dira. Ez da borondaterik egon eskola itzulera negoziatzeko hezkuntza komunitatearekin, ez Nafarroan, ezta EAEn ere, eta neurriak oso motz geratu dira.
-Pertsona helduen eta adin txikikoen zaintza lanak berrantolatu behar dira erabat. Ez da inolako neurririk hartu ratioak jaisteko eta lan taldeak indartzeko helduen egoitzetan, eta ez dakigu nola erantzungo ahal zaion adin txikikoen zaintzari etxera itzuli beharko dutenean.
-Oinarrizko beharrak bermatuak ez dituzten pertsona kopuruak gora egin du.
Garbiñe Aranbururen hitzetan, “gobernu desberdinek elkarrizketa eta akordioak behar direla diote. Ideia hori oso presente egon zen atzo, Jaurlaritzako sailburu berrien izendapenean. Kontua da gobernu honentzat elkarrizketa dela mahai sozioekonomiko bat egokitzea propaganda hutsa egiteko. Gobernu honek aldebakartasunez jokatzen du, gobernu honek gehiengo sindikalari muzin egiten dio. Hau guztia ez dator bat elkarrizketa eta akordioen aldarriarekin”.
LAB sindikatuari oso garrantzitsua iruditzen zaio abiapuntua ezartzea eztabaidari ekin aurretik, “behar duguna ez baita eredu kapitalistaren berreraikitze bat, behar duguna norabide aldaketa bat da. Beste eredu ekonomiko eta sozial batera abiatzeko oinarriak jarri behar dira. Trantsizio ekosozialista eta feminista bat behar dugu”.
LABeko idazkari nagusiaren esanetan, “arduraz jokatuko dugu, eta mobilizatzen eta beste eredu ekonomiko eta sozial bat defendatzen dugunon artean aliantzak eraikitzen jarraituko dugu, bizitza erdigunean jarriko dituzten akordio sozialak gauza daitezen”.