Irailaren 11n berriro ere Diada berri bat ospatzen den egunaren atarian, LABek agur eta babes mezua bidali nahi dio Kataluniako herriari. Urtero bezala, irailaren 11n Kataluniako herria Diada baten ospakizun eta aldarrikapenerako prestatzen da. Aurtengo Diada eguna, nola ez, Covid-19ak baldintzatuta dator, eta urteroko Kataluniako herriaren erakustaldi masibo hau bizi dugun osasun testuingurura egokitu beharko da. Hala eta guztiz ere, pandemiak ez du Kataluniako herria bere eskubide nazionalak aldarrikatzera kalera ateratzea eragotziko.

Pandemia egoerak mugimendu independentistako 9 pertsona herriaren borondate demokratikoa gauzatzen laguntzeagatik kartzelan egotea, beste militante politiko batzuk erbestean egotea eta Dani Gallego madrildarra Kataluniaren kontrako errepresioa salatzeagatik kartzelan egotea salatzea ez du geldituko. Estatuaren errepresioak urtero irailaren 11n olatu independentistak Katalunia osoko kaleak betetzea gelditzea lortu ez duen bezala, aurten pandemiak ez du geldituko Kataluniako herriaren eta herri sektoreen askatasunarekin amesten jarraitzea.

Aurten ez dira egongo mundu osoari herri bat kalean erakutsi eta guztioi oilo ipurdia jartzen diguten airetik ateratako argazkirik. Aurtengoa ez da horretarako garaia; bai, ordea, kalera ateratzeko unea, ezerk geldituko ez gaituela erakusteko, baino egoerak erakusten duen segurtasun neurriak betez, zeren guretzat jendearen bizitza eta zaintza lehen mailako lehentasunak dira.

Berriro ere LAB sindikatua irailaren 11n Bartzelonan egongo da Kataluniako herriari bere babesa adierazteko. Diada guztietan bezalaxe, LAB sindikatuko ordezkaritza batek egunean zehar antolatuko diren ekimen ezberdinetan parte hartuko du, eta bereziki Assemblea Nacional Catalanak antolaturiko mobilizazio bateratuan eta Ezker Independentistak antolaturiko mobilizazioan.

Kataluniako herriaren azken urtetako historiaren lekuko izateko ohorea izan dugu; irailaren 11 guztietan egoteaz gain, 2017ko urriaren 1eko erreferendum historikoan eta handik bi egunera urriaren 3an deituriko greba orokor historikoan egon garelako, eta halaber ondoren antolatu izan diren greba orokor masibo guztietan. Gure aldetik, Kataluniako herriak historia nola egiten duen bizitzen jarraitu nahi dugu, eta, batez ere, bi herrien arteko anai-arrebatasunean sakontzen jarraitu nahi dugu, indarrak batu eta eskuz-esku askatasuna lortu arte borrokan jarraitzeko.