2024-03-29
HomeEkintza PolitikoaFeminismoak Euskal Herriak dituen korapiloak askatzen lagundu eta etorkizuneko erronkei ekarpena egin...

Feminismoak Euskal Herriak dituen korapiloak askatzen lagundu eta etorkizuneko erronkei ekarpena egin behar diela nabarmendu dugu

Herri feminista bat eraiki nahi duen mugimenduak feminista behar du izan ezinbestean, eta helburua bezain garrantzitsua da bertara iristeko prozesua. Horregatik, ezker abertzaleko emakumeok gogoeta prozesu feminista batean murgilduta gaude bete-betean. Atzera begira jartzeko aukera izan genuen urtarrilean, Durangon egindako V. Nazio Batzarrean. Bada, gaur, adierazpen bat aurkeztu dugu komunikabideen aurrean, Bilbon, eta ezkerreko independentismoa indartu eta berreraikitzeko erronka estrategikoa dela berretsi dugu bertan, beste ondorio eta erronken artean. LABeko Exekutiboko kide Izaskun Garciak hartu du hitza agerraldian, besteren artean.

Hauxe da gaur irakurri dugun adierazpena:

EZKER ABERTZALEKO EMAKUME FEMINISTON V. NAZIO BATZARRAREN ADIERAZPENA

Ezker abertzaleko emakume feministok, V. Nazio Batzarraren hausnarketa-prozesuaren baitan, independentismoari, jendarteari eta euskal feminismoari honako hau adierazi nahi diogu:

Bizi dugun testuinguruari erreparatuta…

Eredu sozio-politiko eta ekonomikoaren zilegitasun krisiaren aurrean: alternatibaren garaia da. Euskal jendarteak, sistema kapitalista eta patriarkalaren aurrean, alternatiba eskatzen du eta argi du alternatiba hori ez dela estatuetatik etorriko. Hala, Euskal Herrian irekitzen ari diren alternatibarako burujabetza-prozesuetan parekidetasuna eta feminismoa presente egin behar ditugu.

Jendartearen esparru guztietan eragingo duen estrategia feministaren garaia da. Emakumeok pairatzen ditugun diskriminazio, jazarpen eta biolentzia egoera ezberdinei aurre egiteak egiturazko erabaki eta neurriak behar ditu. Salaketa soilaren eta sasi-irtenbideen garaia pasa da. Sexuen arteko
berdintasunak eta jendarte ez patriarkal baten eraikuntzak anbizio osoko estrategia eta politika feminista eskatzen dizkigu.

Aldaketa politiko eta feministarako aukera erreala da. Euskal Herriak gaitasun eta sentsibilitate feminista zabala ditu eta horrexegatik, euskal feminismoaren gaitasunaren bermeaz, jendarte-eredu berrirantz abiatzeko talentua eta anbizioa dituela uste dugu.

Erronka horri indar berriz heltzeko ezker abertzalea birfundatzen ari den honetan: Prozesu Feminista berritzeko garaia dela uste dugu. Hortaz, estrategia independentistaren jardun osoan feminismoa txertatzeko norabidean ezker abertzaleko emakume feministok urrats berria ematera goaz.

Hori horrela…

Ezkerreko independentismoa indartu eta berreraikitzeko erronka estrategikotzat hartzen dugu. Ezkerreko independentismoa anitza da eta han eta hemen barreiatua dago. Horrexegatik, aldaketa politiko eta soziala nahi duten sektore eta sentsibilitate ezberdinen topagune izaeran sakontzeko ahalegina egitea ezinbestekoa da. Euskal Estatuaren eraikuntza demokratikoak jendarte eredu feminista berez ziurtatuko ez duen arren, azken hau lortzeko bidean ezinbesteko estadioa bilakatzen da. Ezkerreko independentismoak burujabetza eraikitzeko ibilbide bat eta alternatiba oso bat eraiki behar du eta
erronka horretan feminismo abertzaleak bere gaitasun eta indar guztia inplikatu behar duela uste dugu.

Euskal Herriko feminismoak Euskal Herriak dituen korapiloak askatzen lagundu eta etorkizuneko erronkei erantzuteko prozesuari ekarpena egin behar dio, euskal jendarte eta emakume zapalduekin duen konpromisoari erantzunez. Feministok, aniztasunean eta alderdikerien gainetik, elkarrekin lan egitera ohituak gaude eta filosofia hori da euskal jendartean barreiatu eta kutsatu behar duguna.adibidez, gatazka politiko eta
armatuaren konponbidean feminismoa eta emakumearen bizipena aintzat har dadin lan eginez. Bestalde, feminismoaren helburu nagusienetako bat zapaldua den emakume ororen erabaki gaitasuna indartzea da. Hortaz, euskal jendarteak
bere etorkizuna erabakitzeko duen ahalmena aldarrikatu eta gauzatzea feminismoaren erronkak izan behar dira.

Euskal Herriko feminismoarekiko eta aldaketa ekarriko duen estrategia feministarekiko leialtasuna berresten dugu. Euskal Herriko mugimendu feministaren parte izan, emakume taldeetan egon edo bestelako talde edo dinamiketan ikuspegi feminista txertatzen aritu, ezker abertzaleko emakume feministok aukera berriak irekitzeko konpromisoa berretsi nahi dugu.

Ezker abertzaleko emakume feministok urrats feminista emango dugu, Prozesu Feministan sakonduz. Ezker abertzaleko emakume feministak ezker abertzalearen parte gara, kontzientzia feminista bera ez duten bestelako sektore eta pertsonekin historia, proiektu eta estrategia bat konpartitzen dugu. Feminismoa ikusteko molde eta tradizio bat osatzen dugu era berean. Ezker abertzaleak konpromiso feministan sakondu behar duela deritzogu, alde batetik, jardun politikoan feminismoa ardatz gisa hartuz, bestetik, barne-argazkia berrituz eta azkenik, feminismoarekiko ardura eta egitekoei leku propioa eskainiz. Ezker abertzaleko emakume feministok aitzindaritza hartu eta honen garapenerako urrats feminista emango dugu.

Bukatzeko, adierazpen honen azken helburua, euskal emakumeoi eta lurralde ezberdinetako emakume zapalduei gure borroka feministan berresten garela adieraztea izan da. Emakumeok eguneroko bizitzan eta bizi esparruetan, modu agerian edo mendeetako pisuaren islarekin pairatzen ditugun egoera larriei erantzuteko norabide bat hartu dugu. Emakumeok eguneroko bizitzan eta milaka egoeretan azaltzen ditugun erresistentzia eta asmo eraldatzaileei, jendarte berria eraikitzeko etengabeko anbizioari eta zapalkuntzaren aurrean sortzen zaigun ezinegon mingarriari erantzuteko, ezker abertzaleko emakume feministok, hartu dugun bidean eman dugun urrats feministaren berri eman nahi izan dugu.

GORA EUSKAL HERRIA ASKATUTA!

GORA BORROKA FEMINISTA!

GORA GU TA GUTARRAK! GORA HERRIA!
 

 

 

AZKEN ALBISTEAK | ÚLTIMAS NOTICIAS

0-3 urtekoen zikloko sindikatuak berriz mobilizatu dira, Hezkuntza Departamentuari eskatzeko behingoz har dezan alor honetako ardura

Nafarroako 0-3 hezkuntza zikloko sindikatu guztiek (LAB, ELA, STEILAS, AFAPNA, UGT eta CCOO) elkarretaratzea egin dute gaur Iruñean, Hezkuntza Departamentuaren egoitza nagusiaren parean, Gobernuak ziklo honi dagokionez erakusten duen jarrera axolagabea salatzeko. Ildo berean, apirilaren 11n manifestazioa eginen dutela iragarri dute, Departamentuaren egoitzatik 17:30ean abiatuko dena.

Grebak Arabako aisialdi hezitzailea eta animazio soziokulturalean apirilaren 2a eta 4an, hitzarmenaren negoziazioan akordiorik ez dagoelako

Agerraldia egin dute gaur Gasteizen sektoreko langileek bi greba egunak iragartzeko. Hitzarmen duinik ez badago, zerbitzurik ez dela egongo adierazi dute.

Iruñeko eremu urdinean jarduera ia geldirik egon da grebaren hiru egunetan

Enpresa Batzordeak (LAB, ELA, UGT eta CCOO) astelehenetik egiten ari den grebaren balorazio positiboa egin du, eta ohartarazi du Dornierrek ez badu aurrerapausorik ematen lan baldintzak hobetuko dituen hitzarmenaren negoziazioan, mobilizazioekin jarraituko dutela.