2024-04-16
HomeIndustriaZurgintzaEnpresari gardentasuna eta Jaurlaritzari inplikazioa eskatu diote Muebles Xeyko langileek

Enpresari gardentasuna eta Jaurlaritzari inplikazioa eskatu diote Muebles Xeyko langileek

Muebles Xeyko enpresa batzordeak prentsaurrekoa eman du lantegiaren sarreran, Zumaiako Oikia auzoan, enpresaren egoeraz ohartarazi eta euren aldarrikapenak jakinarazteko. Hain zuzen ere, hartzekodunen lehiaketan sartu dira langileak.

Hauxe da GMUko (Muebles Xey) enpresa batzordeak kaleratu duen oharra, ELA, LAB, CCOO eta UGT sindikatuek sinatuta:

Urte asko sufritzen pasa ostean, eta Zuzendaritzak zein komunikabide batzuk kontrakoa saldu nahi izan duten arren, hilzorian egon daitekeen beste enpresa bateko langileak gara gaur hemen aurkitzen garenak, GMUkoak hain zuzen, edo XEY, nahiago baduzue.

"Hilzorian" egon gaitezkeela diogu bai. Azken urte hauetan, desinformazioaren, azpijokoen eta presio ikaragarrien zurrunbilo baten partaide zuzen bilakatu gaituzte, eta dakigun apurra, aste honetan bertan gure Zuzendaritzak Hartzekodunen Konkurtsoa eskatu duela da, likidezia arazo erraldoi bat tarteko.

2012an, XEY egoera kaxkarrean zelarik, ezagutu genuen egun dugun Zuzendaritza berria. Enpresa eta bertoko langileon salbatzaile izateko omen zetozen. Urte guzti hauetan aurreko Zuzendaritzaren eskemetan ikaragarri sufritutako langilegoa ginen, baina gure lanpostuen bermea oinarri hartuta, esperantzaz ireki genizkion ateak 2012 hartan ireki zen fase berriari. Esperantza hura langileon bizkargainean lehertu zen arte.

Egia da Zuzendaritza berriak azken urteetan lana ekarri duela gurera, fakturazioak gora egin duela, baina zein preziotan? Zalantza handiak ditugu lan hori ateratzeko ezinbesteko tresna garen langileok, sekula kontutan hartu izan gaituzten! Opor aldaketak, hilabetero hilabetero nominen ordainketa atzeratzeak, azken lau urteotako aparteko pagak ez ordaintzea, Geroa eta aseguru pribatuen ordainketak etetea, kontratazio berrien merketzea eta hauekiko politika prekarioak. Hauek, gure lan-baldintzek urte guzti hauetan jasan duten gainbeheraren adibide soil batzuk besterik ez dira.

Behin eta berriro zuzendaritzarenak diren erabakiak hartzera behartuak izan gara, gure lan-baldintzen inguruko erabaki horiek zein ondorio ekar lezaketen informaziorik ere jaso gabe. Langileon esfortzuaz subentzionatutako enpresa eredua eraiki dute urte guzti hauetan. Akzionista nagusiek, baztertu ere egin zituzten bere garaian enpresa honetako proiektuan dirua inbertitzeko prest zeudenen eskaintzak. Eta orain, diru arazoak, tarteko hartzekodunen lehiaketan sartzear gara.

Lan harremanei dagokionean ere, bidea ez da errazagoa izan. Informazioa eskatu izan diegun bakoitzean, erantzun badigute, beraiek nahi izan dutenean eta nahi izan duten moduan egin dute. Langileok gardentasuna eskatu diogun bakoitzean informazioa izkutatzearekin erantzun digute, eta gezurrak ere jasan ditugu. Langileon arteko zatiketa bilatu nahi izan dute behin eta berriz, grebarako eskubidea zapuzteko ahaleginarekin, elkarrizketa bat ezin errespetuz eraman izana, banakako "elkarrizketak", enpresaren gainbehera gure errua izango delakoaren mehatxuak. Gure eskubideak aldarrikatu eta defendatzeagatik presionatutako langileak izan gara.

Egoera zaila da guretzat, aspaldian isilean eraman dugun egoera zaila, eta horregatik jotzen dugu komunikabideetara. Desinformazioarekin aspertuta, langileonganako etengabeko neurriekin nekatuta eta egia gosez gaude!

Zor haundiak omen ditu GMUk, baina ez dakigu zehazki zenbatekoak! Lehiaketa fase batean sartzear egonda ere, bizirik irautea nahi omen du zuzendaritzak, baina ez dugu hau nola planteatzen dutenaren informaziorik. Behin eta berriz eskatuta ere, alferrik!

Kolektibo gisa antolatuta gauden langileak gara eta argi daukagu zer nahi dugun eta zergaitik borrokatuko dugun:

– Ez daukagu zehazki gertatu denaren informaziorik, baina langileok gara enpresa honen aktiborik garrantzitsuena eta egoera honi irtenbidea eman behar bazaio ezinbesteko gardentasuna behar duen kolektiboa gara.
– GMU edo XEYrengan sinesten dugu eta benetan, etorkizuna duela uste dugu.
– Enpresa bideragarria dela uste dugu eta horren defentsan arituko gara, lehen bezala, gaur eta etzi.
– Enpresaren arazoa langileok ez garela jakitun, langiloentzat ondorio zuzenik ekarriko ez duen etorkizuna exijitzen dugu.

Ez dakigu ezer onik aterako den hontatik, baina guztion ardura da euskal industria sarearen etorkizuna bermatzea. Gugandik hasita, zuzendaritza, zordunak, insitituzioak… baina batez ere, guzti honetan akzioen %30a duen Eusko Jaurlaritzaren Eskuartze zuzena exijitu nahi dugu. Ez langileok, ezta Zumaia zein Urola Kostako eskualdeak ere, ezin du onartu horrelako beste golperik.

Hau dela eta, etorkizuna eta gardentasuna nahi ditugulako, datozen egunetan lanuzteekin hasiko gara. Bien bitartean, milesker etorri zareten guztioi eta hurrengorarte.
 

 

 

AZKEN ALBISTEAK | ÚLTIMAS NOTICIAS

Ernaik gazte blokea osatuko du Maiatzaren Leheneko Iruñeko manifestazioan

Ernai gazte antolakundeak gazteentzat bizi baldintza duinak aldarrikatuko ditu Maiatzaren Lehenean, eta bat egingo du LABek deitu duen mobilizazio nazionalarekin. 11:00etan Trinitarios plazatik abiatuko den gazte blokean parte hartzera dei egin diete gazteei. Gazteen mobilizazioak Sarasate pasealekuan egingo du bat LABen manifestazioarekin.

Envases Metalurgicos de Álava enpresan bi langile kaleratu dituzte azken 6 hilabeteetan

Pasa den martxoaren 27an egin zuen Laudioko enpresak azken kaleratzea.

Kontzentrazioa Bizkaiko Grafikagintza sektoreko patronalaren aurrean

Apirilaren 29an eta 30ean eta maiatzaren 22an eta 23an greba deitu dugun LAB-ELA-CCOO-UGT sindikatuok CEBEKi eskatu diogu datorren osteguneko bileran sindikatuen plataforma bateratuari erantzun positiboa emateko.