Europar Batasunaren osotasunean nagusitzen ari den politika neoliberalen aurpegirik gordinena ezagutu dugu beste behin ere. Frantziar estatuak pertsona migranteen atxiloketa baldintzak gogortu eta kanporaketak errazten dituen legislazio berria aplikatzen ari da damu barik.

Europako iparralderantz joateko pasabide honetan, Frantzia, mugen kontrol sistematikoaren bidez errefuxiatuei sarbidea ukatzeko neurriak hartzen ari da. Jendarmeek egoera irregularrean dauden pertsona desplazatuak atxilotzen dituzte eta trenean sartu Frantziatik kanporatuak izan daitezen espainiar estatuaren eskuetan utziz. Frantziak alboko estatuen konplizitatea izan du mugak isteko: EuskoTren enpresa publikoak barne prozedura bat garatu du polizia frantsesak atxilotutako pertsona desplazatuak Hendaiatik Irunera garraiatzeko eta ondoren, noski, kalean uzteko. Eusko Jaurlaritzaren enpresako langileentzako agindua beraz, pertsona hauei Frantziatik kanporatua izateko eta haien oinarrizko beharrak ez asetzeko hautua egin duen estatu batera ekartzeko treneko txartela ematea da. Beste behin ere LAB sindikatutik onartezina iruditzen zaigu oinarrizko eskubideen aurka egiten ari diren ofentsiba hau, isilpeko genozidio hau. Eusko Treneko langileak behartuak izaten ari dira pertsona desplazatu hauen aurka ekitera, euren borondate eta eskubideen aurka lan egitera eta ondoren gainera, inongo babesik gabe geratuko diren lurretan ahaztuta uztera.

Abuztuaren 2ko data duen barne komunikazio batean langileek honako “agindua” jaso zuten enpresaren aldetik: “…Frantziako jendarmeriak, egoera irregularrean aurkitzeagatik pertsonen itzultzea egiten duenean…” “…gure langileek pertsonari transfer bidaia-txartela erraztuko diote, hurrengo geltokian jaitsi ahal dela adieraziz (Ficoba)”. Honek,“beroan” egiten diren kanporatze zalantzagarriak gauzatzen laguntzea derrigortzen ditu langileak. Gainera, kanporatutakoak non jaitsi behar duten ere esaten zaie.

Salatzen dugu errefuxiatuekiko solidaridadea adierazi duen gobernu baten enpresa batek, Frantziar politika neofaszistarekin bat egin duen honelako prozedura bat aurrera eramatera ausartu izana. LABetik eskubide guztiak guztiontzat bermatuko dituen erakunde publikoak aldarrikatuko ditugu, errefuxiatuei harrera egin eta beharrezko baliabideak eskainiko dizkiona, babes sistema propio, publiko eta unibertsala. Sindikatutik errefuxiatuekiko elkartasuna adierazi nahi dugu, pertsona desplazatuen aurkako politika arrotzen aurrean zabal dadin herritarron eta herri langileon artean elkartasun sarea.

Eskubide guztiak guztiontzat. Inor ez delako Ilegala!