Eragile sozial, sindikal eta politiko ugarik eta askotarikoek elkarrizketaren aldeko deia egin duten arren, goizaldean Foruzaingoaren eta Polizia Nazionalaren operatibo bateratu batek Maravillas Gaztetxea hustu egin du, eta poliziak hainbatetan oldartu zaizkiete Nabarreria inguruetan zeuden pertsonei.
Maravillas Gaztetxearen jarduerari dagokionez eragile bakoitzak egin lezakeen baloraziotik harago, hauxe da egia borobila: abandonatutako espazio publiko bati erabilera soziala ematen ari zen egitasmo baten kontra indarkeria erabiltzea erabat arbuiagarria da. Aldaketa sustatu duen gehiengo sozial eta politikoaren agenda demokratizatzailearekin bateraezina den gertakaria da zalantzarik gabe.
Maravillas hustu izanaren gaineko erantzunkizun politikoa Geroa Bai eta Uxue Barkos lehendakariarena da. Azken horrek protagonismo tristea hartu du egunotan, oroimen historikoa kontrontazio xedez erabilita lehenbizi, ondoren bilera bat egiteko aukerari atea irekita baina azkenik, 48 ordura, interbentzio polizialari bide emanda. Politika egiteko era horrek Nafarroan aldaketa lideratzeko ezgai bilakatzen ditu hala Geroa Bai nola Uxue Barkos.
LABek abuztuaren 25ean deitutako manifestazioarekin nahiz Maravillas Gaztetxearen alde antola litezkeen bestelako mobilizazioekin bat egiten du, eta dei egiten die nafar langileei hustearen kontra eta aldaketa politiko nahiz sozialaren alde egin dezaten.