Datorren hilabetearen hasieran Bilbon mobilizazio nazionala egingo da, azkenaldian euskararen aurka egondako eraso judizialei aurre egiteko asmoa duena. Ildo horretan, lan munduko eragileek eta sindikatuetako ordezkariek agerraldia egin dute Kontseiluarekin batera gaur, atzo azken eraso judizialaren berri izan ostean, hain zuzen.
Izan ere, EAEko Justizia Auzitegi Nagusiko Administrazioarekiko Auzien Aretoak Euskadiko toki-erakundeetan hizkuntza ofizialen erabilera instituzionala eta administratiboa normalizatzeari buruzko 179/2019 Dekretuaren aurkako ebazpena eman du. 2016ko Udal Legea garatzen zuen dekretu horrek, eta epaileek hainbat artikulu baliogabetu dituzte, osotasunean edo partzialki. Euskalgintzaren Kontseiluak bezala, LABek ere eraso oso larritzat jo du azken hau, eta azaroaren 4ko manifestazioan parte hartzeko beharra biderkatzen du.
Garbiñe Aranburu koordinatzaile orokorrak hartu du parte Bilboko Kafe Antzokian egindako agerraldian sindikatuaren izenean. Hala, lehenengo eta behin, Kontseiluarekin landutako ildoaz jardun du, zeinak euskaraz bizi eta lan egiteko eskubidea bermatzea xede duen: “Kontseiluaren batera, gehiengo sindikalak, administrazioa euskalduntzeko plana eskatu genuen. Plan horren xedea, herritarrok zerbitzua euskaraz jasotzeko dugun eskubidea bermatzea da, baita langile publikoei euskaraz lan egiteko eskubidea bermatzea ere”.
Hala, euskararen aurkako oldarraldi judiziala langileok ere bete-betean nozitzen dugula nabarmendu du, eta bata bestearen atzetik datozen erabaki judizialek, hizkuntza eskakizunak ezartzearen aurka egiten dutenek, agerian uzten dutela erasoaldi orokorra dela, eta ez kasu isolatuak: “Atzo, epaitegietatik iritsitako enegarren epaiaren berri izan genuen. Irmoki salatzen dugu EAEko Justizia Auzitegiak euskaraz lan egiteko dugun eskubidea urratu izana”.
Azaroaren 4an, larunbata, 17:00etan Bilboko Euskalduna Jauregiaren aurretik abiatuko da Euskalgintzaren Kontseiluak deitutako manifestazioa, eta honakoa izango da lelo nagusia: Oldarraldiaren aurrean, euskararekin bat, euskaraz bat.