Beste behin, euskal administrazio baten lan-deialdi baten aurkako beste epai baten berri izan dugu. Oraingoan udal idazkari bitartekoen lan-poltsa osatzeko Eusko Jaurlaritzaren prozesu batean eskatutako hizkuntza-eskakizunen aurkakoa izan da, aurrez Gasteizko epaitegi batek norabide horretan hartutako epaia bigarren instantzian berretsiz. EAEko Auzitegi Nagusiak administrazioaren euskalduntzearen aurka argitaratzen ari den epaien segida luzean beste pauso bat eman du, eta euskaldunon hizkuntza-eskubideen aurkako oldarraldi judizialean urtats bat gehiago egin.
Ebazpen honek udaletan euskararen normalizazioa sustatzeko hamarkadatan egindako lana kolokan jar dezake, beraien funtzioa dela-eta udal-idazkarien figurak udaletako hizkuntza-ohituretan duten garrantzia ikusirik. Beraz, ondorio kezkagarriak izan ditzakeen erabaki salagarria da, LABen iritziz. Ezinezkoa izango da udaletan euskara normalizatzea langileak euskaldun izan ezean. Zentzu horretan, bereziki iraingarria eta salagarria da epaiak adierazten duen euskararen eskakizuna “zeharo baztergarria” denaren baieztapena.
Epai-segida luze batean beste bat gehiago izanagatik, euskaldunok eta eragile euskaltzaleok ezin gara etsipenean erori. Hori ere bada sektore euskarafoboek bilatzen dutena. Epaiak bata bestearen atzetik ebatzita, gu etsitu eta euskararen normalizazio-prozesua gerarazi nahi dute, prozesu horren motor nagusietakoa izan den administrazioaren euskalduntzea jomugan hartuta, une honetan.
Horregatik, “aski da!” ozen oihukatzeko unea da, LABen ustez. Euskaltzaleok aktibatu eta euskararen eta gure hizkuntza-eskubideen defentsan irmo azaldu behar gara, beste behin. Era berean, administrazioan euskararen normalizazio osoa erdiesteko prozesua legez babesteko araubide egokia onartzea exijitzen die LABek alderdi politikoei eta instituzioei. Araubide berri egokia onartu ezean, administrazioaren euskalduntzeak epaitegien jopuntuan egoten jarraituko du, egoera guztiz zaurgarrian. Prozesu horri ziurtasun juridikoa ematea ez da etorriko epaitegiek ezarritako euskalduntzearen aurkako jurisprudentzia itogarria onartzetik; alderantziz, ziurtasun juridikoa lege-babes berri egokia onartzetik etorriko da.