Osoko bilkuran, LAB sindikatuak txostenari bere onespena emateko 11 emendakin aurkeztu zituen. Haurreskolen inguruan, euskalduntzea lortzeko hizkuntza ereduak gainditzeko, segregazioaren kontra, berdintasunaren inguruan… 11 emendakin horietatik 3 onartu zituen batzar iraunkorrak, beste 2 adostu genituen eta emendakin bat osoko bilkuran bozkatu eta onartu egin zen.
Onartutako emendakinak horrela dio: ”Haurreskolen doakotasuna helburua izanik eta horren bidean, 18.000 euro baino gutxiagoko diru sarrerak dituzten familiei haurreskola dohanik izango dutela bermatu behar da. Izan ere, haurreskolen doakotasunaren helburua lortzeko beste neurrietan sakondu behar da”.
Uztailaren 3an, Euskadiko Eskola Kontseiluko lehendakaria den Nelida Zaitegik, prentsaurreko baten bitartez, txostenaren proposamenak aurkeztu zituen. Baina aurkezpen horretan, Eskola Kontseiluko Lehendakariak, osoko bilkuran kontseiluko batzorde iraunkorraren iritziaren kontran bozketaren bitartez onartu zen haurreskolen doakotasunaren inguruko proposamena aipatu gabe utzi zuen. Huts egite hau ez da kasualitatea izan. Huts egite honek EAJ eta Hezkuntza saila haurreskolen doakotasunaren kontrako eta hauek Hezkuntza Sailean integratzeko kontrako politikari erantzuten dio.
LABek Euskadiko Eskola Kontseilua Hezkuntza Sailaren menpeko tresna dela salatu nahi du. Hezkuntza komunitateak eta Eusko Legebiltzarrak argi eta garbi esan dio Hezkuntza Saila Haurreskolak doakoak izan behar direla eta Kontseiluak errealitate hori manipulatu du, ezabatuz.
Izan ere, LABek Eskola Kontseiluko Lehendakariari ausardia eskatzen dio EAJ eta Hezkuntza Departamentuaren txotxongiloa ez bihurtzeko.
Gauzak horrela, gure kezka azaldu nahi dugu Eskola Kontseiluaren osaketa eta kudeaketaren inguruan. Osaketak ez dio EAEko Hezkuntza Komunitatearen ordezkaritzari erantzuten, EAJren
interesen araberako ordezkaritza dagoelarik. Hala, hezkuntza-komunitatearen gehiengo zabalaren ideiak, gutxiengoan gelditzen dira Kontseiluan. Horren adibide mingarria da, besteak beste, hizkuntza ereduak gainditzeko konpromiso eza edo hezkuntzako langile guztien eta publikoko ordezkaritzaren oniritzik gabe, Oinarrizko Hezkuntza Akordioaren dokumentuari jarraipena ematea eta parlamentura eramate.
Beraz, arazo larri hauek konpontzeko LABek neurri zehatzak eskatuko ditu, Euskadiko Eskola Kontseilua hezkuntza komunitate osoa ordezkatzeko, parte hartzailea eta kudeaketan gardena izateko.