LABeko irakasleen ordezkaritza bat Sindicat de Traballadores i Treballadors de l’Enseyament del Pais Valencià (STEPV) sindikatuaren 13. biltzarrean izan da asteburuan, Alcossebre herrian. LABeko ordezkari Joxe Mari Zendoiak hartu du hitza bertan, eta Eskola Publiko Komunitarioa aldarrikatu dugu.

Hauxe izan da LABeko ordezkariek egindako hitzartzea:

Lehenik eta behin, eskerrak eman nahi dizkiegu STEPV sindikatuko kideei, egun hauetan ospatutako biltzarrean egoteko aukera eskaintzeagatik.

LAB sindikatua, justizian eta elkartasunean oinarrituko den jendarte baten alde borrokatzen duen sindikatua da. Euskal Herriko 7 herrialdeetan antolatuta dagoen sindikatu bakarra gara, eta gure herriaren eskubide zibil eta politikoen alde aritzen gara.

Gaur egun, kapitalismoaren baitan hainbat krisi ari dira pilatzen: zaintzarena (lan guztiak aitortu eta banatu beharra), energetikoa (erregai fosilen agorpena), ekologikoa (klima aldaketa eta ekosistemaren suntsiketa), geopolitikoa (gerrak eta interbentzioak), demografikoa (migrazioak). Kapitalaren eta bizitzaren arteko talka gero eta bortitzagoa da. Elite ekonomiko batetik kanpo dagoen ororentzat bizi eta lan baldintzen prekarizazioa dakar sistema honek, jendartearen gehiengo zabalarentzat eredu hau ez da jasangarria.

LAB sindikatuak Euskal Herriko langileak maila indibidual edota kolektiboan aktiboki laguntzen ditu: aholkularitza emanez, langileriaren interesak defendatuz eta lan eskubideen defentsarako antolaketan eraginez.

Eta horretan ari gara egunero… Sistema bide gabe honi hortzak erakutsi eta eraldaketa sozialaren aldeko borroka indartzen. Erasoei agenda propio batekin erantzuten ari gara, indarra eta determinazioa badugulako. Azkenaldian mobilizazio jendetsuak ikusten ari gara. Gehiengo bat da beste eredu ekonomiko eta sozial baten alde kalean mobilizatzen ari dena. Bizitza erdigunean jarriko duen eredua, lan guztien aitortza eta banaketaren alde egingo duena eta sortzen den aberastasuna hobe banatuko duen eredua. Justizia sozialean eta feminismoan oinarritutako eredu berria.

Honekin batera, sektore publikoan, enplegua kontsolidatzeko eta egonkortzeko lege propio baten aldarria egiten ari gara. Enplegu publikoaren eremuan egin diren politika publikoen ondorioz, behin-behinekotasun tasa asko igo da, eta eremu batzuetan 20 urte daramate deialdi publikorik egin gabe. Adineko eta antzinatasun luzeko behin-behineko langileen kolektiboa gero eta handiagoa da, eta eremu batzuk oso feminizatuak dira. Zerbitzu publikoak ahuldu eta pribatizazioaren eta merkantilizazioaren joera indartzeko estrategia garbi baten gatibu gaude Euskal Herrian ere.

Irakaskuntzari dagokionez, Euskal Herrian ere, azken urteetan, lan zentroak hustu eta kalera irten gara lan baldintzak hobetu eta herri honek behar duen benetako hezkuntza publikoa aldarrikatzera. Hezkuntza, jendartearen eraikuntzarako bidean, eraldaketarako tresna bezala ulertzen baitugu eta horren alde lanean ari gara. Etorkizuneko hezkuntza sistema, langileon lan baldintza duinak jasotzeaz gain, herriaren beharretara egokitu beharko da, eta gainera, ikaslea erdigunean kokatuko du, berau ardatz bilakatuz eta hezkuntza kalitatea bera bermatuz.

Hala ere, garbi daukagu, gauza asko hobetu behar direla oraindik. Euskal Herriko hamaika txokotan hezkuntza arazoak ugaritzen eta larriagotzen ari dira: proiektuak aurrera eraman nahi eta hauek garatzeko finantziazio falta; euskararen erabilera eta kalitatean beherakada; euskal kulturaren transmisioan hutsune larriak; pedagogia eredua aldatzeko nahi eta ezina; hezkidetza planak bai, baina emaitzak ikustea kosta… eta nola ez, jatorri eta egoera ekonomikoaren araberako segregazioa gainditzeko nahia eta ezina. Honek erakusten du, Hezkuntza Sistema bera agortua dagoela, orain arteko hezkuntza sistemak ez digula balio alegia.

Hezkuntza sistema berria behar dugu, eta jauzia emateko prest gaude. Euskal Publikotasuna, Euskal Herritik Euskal Herrirako pentsatua.

2016ko maiatzean, IRUTEN dinamika abiatu genuen, inposaketak salatzeaz gain, hezkuntza sistema propiora bidean gaurdanik urrats praktikoak emateko erronkarekin. Ebaluazioa erdigunean jarri eta jardunaldiak antolatu genituen. Elikadura burujabetza ardatz hartuta, jangelen ereduaren inguruan hausnarketa burutu dugu ere. Ikasturte honetan, sexu heziketari buruzko gida kaleratu dugu. Era berean, gure hezkuntza egitasmoa berritu dugu, euskal jendarteari proposamen sendo eta integrala aurkeztuaz. Zentzu honetan, argi dugu langileriak babesa eman diola LABek eskaintzen duen proiektu integralari, eta horregatik 1go indar bezala berretsi gara Hego Euskal Herrian.

Guk, gurea izango den hezkuntza sistema nahi dugu, gure herriak dituen beharretara egokituta. Eskola publiko komunitarioa aldarrikatzen dugu, eta horretarako Espainiako zein Frantziako eredu publiko zentralistatik urrutiratuz. Gaur egungo egoeratik abiatu eta etorkizuneko hezkuntza sistemara trantsizio bat proposatzen dugu. Bide honetan eskumen osoak geureganatu eta egungo eskola publikoaren eta itundutako sarearen arteko konfluentzia defendatzen dugu. Beraz, ez dugu arazoa publiko-kontzertatu sareen baitan kokatzen, honek zatiketa elikatu eta gatazka hauspotu besterik ez duelako egiten. Adostasunetara iristeko eta arduraz jokatzeko garaia dela deritzogu. Bide horretan aurkituko gaituzue.

Zorionak eta aurrera!